ایمز ٹی وی(لاہور) وزیر ریلویز خواجہ سعد رفیق کو پاکستان ریلویز ہیڈکوارٹرزآفس لاہور میں منعقدہ اعلیٰ سطح کے اجلاس میں ڈویڑنل سپرنٹنڈنٹ لاہورمحمد سفیان ڈوگر نے شیخوپورہ ٹرین حادثے کی تحقیقات میں پیش رفت کے بارے بریفنگ دی،
وزیر ریلویز خواجہ سعد رفیق ، چیف ایگزیکٹوآفیسر محمدجاوید انور ، مشیر ریلویز انجم پرویز ، ممبرفنانس غلام مصطفی، ایڈیشنل جنرل منیجرانفراسٹرکچر ہمایوں رشید ، ایڈیشنل جنرل منیجر مقصودالنبی دیگر اعلیٰ افسران کو بریفنگ میں بتایا گیاکہ فیڈرل گورنمنٹ انسپکٹرآف ریلویز یکم اپریل کو اپنی تین روزہ تحقیقات مکمل کریں گے جس کے بعد حادثے کے حوالے سے اصل حقائق سامنے آسکیں گے۔
ابتدائی رپورٹ کے مطابق گیٹ مین نے غیر معمولی وقت ضائع کیا جبکہ اسے ایکسل ٹوٹنے کا علم ہونے کے بعد وقت کا دانشمندانہ استعمال کرتے ہوئے نائیٹ کوچ کو روکنے کے لیے بروقت اطلاع پہنچانی چاہیے تھی۔ وزیر ریلویز کو بتایا گیا کہ جس وقت گیٹ مین نے سگنل اپ کرنے کے لیے اطلاع دی اس وقت ٹرین سگنل کراس کرچکی تھی۔
انجن کے معائنے سے ثابت ہواکہ ٹرین ڈرائیور نے بریک لگانے کی کوشش کی مگر گاڑی پوری طرح نہ رک سکی۔خواجہ سعد رفیق نے کہا کہ حادثے میں نقصان بھی پاکستان ریلویز کا ہوا اور مخصوص مفادات کے لیے ٹارگٹ بھی پاکستان ریلویز جیسے قومی ادارے کو بنایا جارہاہے جوقابل افسوس ہے۔ انہوں نے کہا کہ پاکستان ریلویز کے افسران اس کی بہتری کے لیے دن رات کام کررہے ہیں ،
وہ حوصلہ مت ہاریں، ہم پاکستانی قوم کو ایک جدید اور محفوظ ریلوے دینے کا عہدپورا کریں گے۔ اجلاس میں بتایا گیا کہ چینی ساختہ انجن اور بوگیوں کی مرمت کا تخمینہ تیار کیا جارہا ہے۔ خواجہ سعد رفیق نے کہا کہ مالی نقصان سے بڑا نقصان یہ ہے کہ ہمارے دوتجربہ کار کارکن اس حادثے میں شہید ہوگئے۔ یہ نقصان ناقابلِ تلافی ہے۔ انہوں نے کہا کہ حادثے کی تحقیقات میں سامنے آنے والی خامی ، کمی اور کوتاہی پر غور کرنے کے لیے اجلاس ہفتے کے روزدوبارہ ہوگا۔ ریلوے کے پروفیشنل اورتجربہ کار افسران سٹینڈرڈ آپریٹنگ پروسیجرز میں بہتری کے لیے تجاویز جوبیس گھنٹوں کے اندر تیار کریں۔
انہوں نے اس موقع پر افسران کو وزارتِ دفاعی پیداوار کے ذیلی ادارے نیسکام کے ساتھ ٹرینوں کے حادثات کی روک تھام کے نظام کی تیاری میں پیش ر فت کے حوالے سے بتایا کہ پاک فوج کے اعلیٰ افسران ان کی درخواست پر اس نظام کی جلداز جلد تیاری میں خصوصی دلچسپی لے رہے ہیں جس پر وہ ان کے شکر گزار ہیں۔ خواجہ سعد رفیق نے کہا کہ وہ عوام سے بھی اپیل کرتے ہیں کہ لیول کراسنگز پر خصوصی احتیاط کا مظاہرہ کریں۔