پیر, 27 جنوری 2020


4سال بعد جسٹن بیبرکانیاگاناریلیز

معروف کینیڈین نژاد امریکی پاپ اسٹار جسٹن بیبر نے 4 سال بعد اپنا پہلا گانا ریلیز کردیا جس کے شائقین کو امید ہے کہ جلد وہ اپنا نیا ایلبم بھی ریلیز کریں گے۔
 
جسٹن بیبر نے پہلے ہی اعلان رکھا ہے کہ وہ 2020 میں اپنا پانچواں میوزک ایلبم ریلیز کریں گے۔
 
جسٹن بیبر کا آخری میوزک ایلبم ’پرپوز‘ 2015 میں ریلیز ہوا تھا جب کہ ان کا آخری سنگل گانا بھی 2016 میں ریلیز ہوا تھا۔
 
گزشتہ 4 سال سے جسٹن بیبر نے کوئی بھی نیا گانا ریلیز نہیں کیا تھا اور ان کی جانب سے گانا ریلیز نہ کیے جانے کی وجہ سے ان کے مداح مایوس تھے۔
 
جسٹن بیبر کی جانب سے میوزک سے دوری کی وجہ سے لوگوں کا خیال تھا کہ ان کا کیریئر ختم ہو چکا ہے، تاہم گلوکار وقتا بوقتا جلد میوزک کی دنیا میں واپسی کا اعلان کرتے رہے۔
 
گزشتہ 5 سال کے دوران جسٹن بیبر کی زندگی میں کافی اتار چڑھاؤ آئے اور انہوں نے دیرینہ گرل فرینڈ سیلینا گومز سے تعلقات ختم کرنے کے بعد خود کو سوشل میڈیا اور میوزک دنیا سے دور کر رکھا تھا۔
 
بعد ازاں جسٹن بیبر نے امریکی ماڈل ہیلی ہالڈ وین سے منگنی کرکے سب کو حیران کیا اور گزشتہ برس ہی انہوں نے ماڈل سے شادی کرکے نئی زندگی کا آغاز کیا۔
 
جسٹن بیبر نے گزشتہ سال سوشل میڈیا پوسٹ کے ذریعے انکشاف کیا تھا کہ وہ ذہنی مسائل اور صحت کا بھی شکار رہے جس وجہ سے وہ موسیقی کی دنیا سے تقریبا دور تھے۔
 
کینیڈین نژاد امریکی گلوکار کی جانب سے 4 سال بعد نیا گانا ’یمی‘ سال نو کے موقع پر 2 جنوری 2020 کو ریلیز کیا گیا اور ان کا گانا آتے ہی وائرل ہوگیا۔
 
اس گانے کو اب تک یوٹیوب پر ایک کروڑ سے زائد بار دیکھا جا چکا ہے۔
 
سنگل گانے کو ریلیز کرنے سے قبل جسٹن بیبر کی زندگی پر ’یوٹیوب‘ کی جانب سے بنائی جانے والی دستاویزی فلم کا ٹریلر بھی سامنے آیا تھا اور ان کی زندگی پر بنائی گئی ڈاکیومینٹری کو رواں ماہ 27 جنوری کو ریلیز کیا جائے گا۔
 
خیال رہے کہ جسٹن بیبر نے 2006 میں گلوکاری کا آغاز کیا اور انہیں 2007 میں اس وقت شہرت ملی تھی جب ان کا گانا ’یوٹیوب‘ پر وائرل ہوا تھا۔

پرنٹ یا ایمیل کریں

Leave a comment