ایمز ٹی وی (انٹرٹینمنٹ) بالی ووڈ کے دبنگ سپر اسٹار سلمان خان اپنی نئی آنے والی فلم ’’سلطان‘‘ میں پہلوانی کے ساتھ ساتھ ٹریکٹر چلاتے نظرآئیں گے۔ بالی ووڈاسٹار سلمان خان اپنی نئی آنے والی فلم ’’سلطان‘‘ میں پہلوان کا کردار نبھارہے ہیں جس کے لیے انہوں نے اپنے وزن میں اضافے کے ساتھ ساتھ مارشل آرٹ اور پہلوانی بھی سیکھی ہے تاہم اب ایک بار پھر سلو میاں اپنے کردار میں ڈھلنے کے لیے فلم میں منفرد کام کرتے نظر آئیں گے۔
میڈیا رپورٹس کے مطابق سلمان خان اپنی نئی آنے والی فلم’’سلطان‘‘ میں پہلوانی کے ساتھ کھیتوں میں ٹریکٹر کے ذریعے ہل چلاتے نظرآئیں گے جس کی شوٹنگ گزشتہ دنوں بھارتی پنجاب میں کی گئی ہے جب کہ فلم کے ڈائریکٹر عباس نے سماجی رابطے کی ویب سائٹ ٹوئٹر پر فلم کی شوٹنگ کے اختتام کے اعلان کرتے ہوئے سلمان خان کی ٹریکٹر چلاتی تصویر شیئر کی ہے۔ واضح رہے کہ فلم ’’سلطان‘‘ رواں سال عید الفطر کے موقع پر ریلیز کی جائے گی۔