ایمز ٹی وی(انٹر ٹینمنٹ)بالی ووڈ کے سپر اسٹار عامر خان اپنے کردار میں ڈھل جانے کے حوالے سے شہرت رکھتے ہیں یہی وجہ ہے کہ ہر فلم سائن کرنے سے پہلے اپنے کردار میں ڈھلنے کے لیے طویل عرصہ محنت کرتے ہیں۔ عامر خان کی متعدد فلمیں بلاک بسٹر ثابت ہوئی ہیں جنہوں نے باکس آفس پر ریکارڈ بزنس کیا ہے تاہم اب پہلی بار انہوں نے اپنی فلموں سے متعلق حیران کن انکشاف کیا ہے۔

اپنے انٹرویو میں عامر خان کا کہنا تھا کہ میں اپنی فلم کی کامیابی سے متعلق خوفزدہ رہتا ہوں جس کے باعث چھوٹی چھوٹی چیزوں پر پریشان ہوتا ہوں کیوں کہ پوری فلم مجھ پر انحصار کرتی ہے اور اگر مجھے کچھ ہوگیا تو پھر فلم کا کیا ہوگا۔ انہوں نے کہا کہ میں کسی بھی فلم کی تکمیل کے بارے میں حتمی طور پر کچھ نہیں کہتا۔

فلموں میں اپنی اداکاری کے حوالے سے بالی ووڈ سپر اسٹار کا کہنا تھا کہ میں نے باقاعدہ طور پر اداکاری کی تعلیم کہیں سے حاصل نہیں کی لیکن 30 سالہ فنی کیرئیر میں اپنی غلطیوں سے بہت کچھ سیکھا جس کی وجہ سے مجھے اپنی اداکاری کو نکھارنے کا موقع ملا ہے۔

واضح رہے کہ عامر خان اپنی نئی آنے والی فلم’’دنگل‘‘ کی شوٹنگ میں مصروف ہیں جو رواں سال دسمبر میں نمائش کے لیے پیش کی جائے گی۔