سوشل میڈیا پلیٹ فارم ایکس (ٹوئٹر) ایک متنازع تبدیلی پر عملدرآمد شروع ہوگیا ہے۔

ایکس کے ایک آفیشل اکاؤنٹ پر بتایا گیا کہ بلاک فیچر میں کی جانے والی اپ ڈیٹ کو متعارف کرانے کا سلسلہ شروع کر دیا ہے۔

ابھی اگر ایکس پر آپ کو کوئی بلاک کردے اور پھر آپ اس فرد کی پروفائل دیکھنے کی کوشش کریں تو یو آر بلاکڈ لکھا نظر آتا ہے۔
آپ اس فرد کے اکاؤنٹ کے فالوورز، ریپلائیز یا دیگر تفصیلات بھی نہیں دیکھ سکتے، مگر اس نئی تبدیلی کے بعد اس صارف کی پبلک پوسٹس اور پروفائل پیج کو دیکھنا ممکن ہوگا۔

البتہ اب بھی بلاک ہونے پر آپ اس صارف کو فالو نہیں کرسکیں گے، ڈائریکٹ میسج یا پوسٹس پر ریپلائی نہیں کرسکیں گے۔

خیال رہے کہ ایلون مسک بلاک فیچر کے سخت مخالف ہیں اور اگست 2023 میں انہوں نے عندیہ دیا تھا کہ بلاک کا آپشن ختم کیا جا سکتا ہے۔

یہ فیچر ایکس پر بہت زیادہ استعمال کیا جاتا ہے مگر کمپنی کے مطابق ہمارا مقصد صارفین کو زیادہ کنٹرول فراہم کرنے کے ساتھ ساتھ پوسٹس تک عوامی رسائی کو برقرار رکھنا ہے۔