اتوار, 27 مئی 2018


صدر مملکت نے ’فاٹا دائرہ کار بل‘ کی منظوری دیدی

 

ایمز ٹی وی (اسلام آباد)صدر مملکت ممنون حسین نے سپریم کورٹ اور پشاور ہائی کورٹ کے دائرہ اختیار کی فاٹا تک توسیع کے بل "فاٹا دائرہ کار بل" کی منظوری دے دی ہے۔یہ بل قومی اسمبلی اور سینیٹ سے پاس ہونے کے بعد وزیر اعظم کی طرف سے صدر مملکت کے پاس منظوری کے لیے بھیجا گیا تھا۔ تیرہ اپریل کو سینیٹ میں سپریم کورٹ اور پشاور ہائیکورٹ کا دائرہ کار وفاق کے زیر انتظام علاقے فاٹا تک بڑھانے کے لیے ’فاٹا دائرہ کار بل 2017‘ منظور کیا گیا تھا، جبکہ یہ بل قومی اسمبلی سے بھی منظور ہوچکا ہے۔

واضح رہے کہ اس سے قبل یہ بل ایوان بالا میں بھی منظوری کیلئے پیش کیا گیا تھا، جس پر جے یو آئی ف اور پشتونخوا ملی عوامی پارٹی نے اجلاس میں بل کی مخالفت اور اجلاس سے بائیکاٹ کیا، جس کے بعد پیپلزپارٹی، ن لیگ اور تحریک انصاف سمیت دیگر شرکاءنے بل منظور کرلیا تھا۔

صدر مملکت نے وزیر اعظم شاہد خاقان عباسی کی سفارش پر بل کی منظوری دی جس کے بعد یہ بل فوری طور پر نافذ العمل ہوگیا ہے۔ ملک بھر کی سیاسی جماعتوں کے نمائندوں اور فاٹا کے عوام نے فاٹا دائرہ کار بل 2017 کی منظوری کو فاٹا کی قومی دھارے میں شمولیت کی جانب پہلا قدم قرار دیا ہے۔

 

 

پرنٹ یا ایمیل کریں

Leave a comment