ایمزٹی وی(کراچی)سٹی کورٹ میں وکلا نے غنڈہ گردی کا مظاہرہ کرتے ہوئے نجی چینل ایکسپریس نیوز کے سینئر رپورٹر کو بیہمانہ تشدد کا نشانہ بنایا۔
میڈیا ذرائع کے مطابق کراچی سٹی کورٹ میں وکلا نے ایکسپریس نیوز کے سینئر رپورٹر ارشد بیگ کو تشدد کا نشانہ بنایا۔ عدالت میں سی ویو پر قتل ہونے والے نوجوان ظافر کے کیس کی سماعت ہوئی۔ عدالت نے مقدمے کے اہم ملزم جنید شاہ کی عبوری ضمانت منسوخ کرتے ہوئے اسے گرفتار کرنے کا حکم دیا لیکن وکلا نے جنید شاہ کو فرار کرا دیا۔
پولیس نے ملزم کو گرفتار کرنے کی کوشش کی لیکن وکلا نے غنڈہ گردی کرتے ہوئے پولیس کو روک دیا اور اس دوران مقدمے کے تفتیشی افسر عامر الطاف اور ایکسپریس نیوز کے سینئر رپورٹر ارشد بیگ کو مارا پیٹا۔ وکلا نے مقدمے کی کوریج کرنے پر صحافی ارشد بیگ سے ان کا موبائل فون بھی چھین لیا اور ایک گھنٹہ تک حبس بیجا میں رکھا۔ واضح رہے کہ ظافر قتل کیس میں ملزم جنید شاہ مقدمے میں عبوری ضمانت پر رہا تھا۔