ایمز ٹی وی (نیوز ڈیسک) پولیس نے جمعے کے روز کراچی کے علاقے ماڑی پور سے کالعدم تحریک طالبان پاکستان کے سات مشتبہ عسکریت پسندوں کو گرفتار کرنے کا دعویٰ کیا ہے۔ انسداد شدت پسندی سیل کے انچارج علی رضا نے بتایا کہ پولیس کے انسداد دہشت گردی محکمے نے کارروائی کرتے ہوئے طالبان کے مقامی کمانڈر حاجی شیر محمدکو ان کے چھ ساتھیوں سمیت ماڑی پور سے گرفتار کیا۔ انہوں نے دعویٰ کیا کہ کمانڈر کے ٹی ٹی پی مہمند کے چیف عمر خالد خزاسانی سے قریبی روابط ہیں اور وہ ان کی ہدایت پر اپنے ساتھیوں کے ساتھ مل کر شہر میں دہشت گرد حملے کی منصوبے بندی کررہے تھے۔ ان کا کہنا تھا کہ ملزمان ٹی ٹی پی کے لیے تاجروں سے شہر میں بھتہ جمع کرنے میں ملوث تھے۔ انہوں نے مزید بتایا کہ ملزمان کے قبضے سے بڑی تعداد میں اسلحہ و بارود بھی برآمد ہوا ہے۔