ایمزٹی وی (کھیل) دفاعی چیمپئن کو دفاعی حکمت عملی لے ڈوبی۔ یورو فٹ بال کپ میں اٹلی نے اسپین کو دو صفر سے شکست دے کر ایونٹ سے باہر کر دیا۔ کوارٹر فائنل میں اٹلی کا مقابلہ ورلڈ چیمپئن جرمنی سے ہو گا۔ پیرس میں اسپین اور اٹلی کی مضبوط ٹیمیں پری کوارٹر فائنل میں مدمقابل ہوئیں۔ اسپینش سائیڈ کو دفاعی حکمت عملی کا خمیازہ بھگتنا پڑا۔ تینتیسویں منٹ میں جارجیو کیلینی نے گول کرکے اٹلی کو برتری دلائی۔ اطالوی گول کیپر نے اسپین کو مقابلہ برابر کرنے کا موقع نہیں دیا اور کئی یقینی گول بچائے۔ فاتح سائیڈ کی جانب سے دوسرا گول ایکسٹرا ٹائم میں پیلے نے سکور کیا۔ اٹلی نے دفاعی چیمپئن اسپین کو دو صفر سے شکست دی۔ کوارٹر فائنل میں اٹلی کا سامنا ورلڈ چیمپئن جرمنی سے ہو گا۔