ایمز ٹی وی (تعلیم /کراچی) سیکرٹری کالج ایجوکیشن ڈاکٹر ریاض میمن سے سندھ پروفیسرزاینڈ لیکچرارز ایسو سی ایشن کے اعلیٰ سطح کے وفد نے ملاقات کی۔ وفد کی قیادت سپلا کے مرکزی صدر پروفیسر فیروز الدین صدیقی نے کی جبکہ وفد میں پروفیسر سید علی مرتضیٰ، پروفیسرشاہجہا ں پنھور و دیگر شامل تھے۔ سپلا کے وفدنے ڈاکٹر ریاض میمن کو سندھ کے کالج اساتذہ کے مسائل اور تحفظات کو پیش کیا اور بتایا کہ سندھ کے کالج اساتذہ کے ساتھ امتیازی سلوک نا قابلِ فہم ہے، جب باقی صوبوں کے فورٹیئر فارمولا پر نظر ثانی کر کے اس کے مطابق ترقیاں دی جاچکی ہیں تو پھر صوبہ سندھ کے کالج اساتذہ اس سے محروم کیوں ہیں۔ ڈاکٹر ریاض میمن نے سپلا کے پیش کردہ مسائل کو بغور سنا اور فوری طور پر سندھ کے کالج اساتذہ کے سروس اسٹرکچرفورٹیئر فارمولا پر نظر ثانی کیلئے پروفیسر ڈاکٹر ناصر انصار ڈی جی کالجز سندھ کی سربراہی میں کمیٹی تشکیل دی گئی ۔