ایمز ٹی وی (تعلیم /اسلام آباد ) مصدق ملک خان کو ہٹا کر حسنات قریشی کو چیئرمین نجی تعلیم ریگولیٹری اتھارٹی تعینات کر دیا گیا ۔ سابقہ چیئرمین پیرا کی تبدیلی کی فوری وجہ پرائیویٹ اسکولوں کی رجسٹریشن کے مسائل بنی۔رجسٹریشن نہ ہونے کے سبب پرائیویٹ اسکولوں کے پچیس سے تیس ہزار پرائمری اور مڈل کلاس کے طالب علم ریگولر طالب علم کی بجائے پرائیویٹ طالب علم کے طور پر امتحان دینے پر مجبور تھے۔ وزیر کیڈ نے اس کوتاہی کا سختی سے نوٹس لیا اور ہدایت کی کہ اس امر کو یقینی بنایا جائے کہ بچے ریگولر طالب علم کے طور پر ہی امتحان دیں۔انھوں نے کہا کہ کسی بھی ادارے یا فرد کی نااہلی کی وجہ سے بچوں کومشکلات سے دوچار نہیں ہونے دیا جائے گا۔ عہدے کی تبدیلی کے احکامات ہوتے ہی مصدق ملک خان نے منگل کے روز چیئرمین پیر ا کا چارج چھوڑ دیا۔ وزیر مملکت نے نئے چیئرمین کو فوری ہدایت کی کہ تمام دیہی اور شہری پرائیویٹ اسکولوں کے نمائندوں سے ملاقات کر کے ان کے مسائل کو ہنگامی بنیادوں پر حل کیا جائے اور اس بات کو یقینی بنایا جائے کہ طلباء کا داخلہ ریگولر طالب علم کے طور پر بھیجا جائے ۔ پیراقوانین میں تمام اسٹیک ہولڈرز کے ساتھ مشاورت کے ذریعے ضروری ترامیم لائی جائیں تاکہ پرائیویٹ اسکولوں کے مسائل فوری حل ہوں اور طالب علموں کیلئے مشکلات پیدا نہ ہوں۔