ایمزٹی وی (ایجوکیشن)جامعہ کراچی کے شعبہ ابلاغ عامہ کے طالب علموں نے اپنے اساتذہ کی سربراہی میں گزشتہ روز  سندھ مدرستہ الاسلام یونیورسٹی کا دورہ کیا۔ اس دوراں وفد میں شامل طلباء وطالبات نے سندھ مدرسہ یونیورسٹی کے جناح میوزیم، ٹی وی اسٹوڈیو، ایف ایم ریڈیو اسٹوڈیو، لائبریری ، کمپیوٹر لیبارٹریز اور شعبہ میڈیا اسٹڈیز کا دورہ کیا بعد ازاں سندھ مدرسہ یونیورسٹی کے سرشاہنواز بھٹو آڈیٹوریم میں منعقدہ ایک تقریب میں جامعہ کراچی کے طالب علموں سے خطاب کرتے ہوئے سندھ مدرسہ یونیورسٹی کے وائس چانسلر ڈاکٹر محمد علی شیخ نے سر سید احمد خان اور خان بہادر حسن علی آفندی کی جانب سے برصغیر میں مسلمانوں کی جدید تعلیم کیلئے انجام دی گئی خدمات اور کاوشوں پر روشنی ڈالتے ہوئے کہا کہ سندھ مدرستہ الاسلام یونیورسٹی علی گڑھ یونیورسٹی کا ہمعصر ادارہ ہے۔ انہوں نے کہا کہ سندھ مدرستہ الاسلام یونیورسٹی کا شمار اس وقت ملک کی اعلیٰ ترین جامعات میں ہوتا ہے، جہاں پر معیاری تعلیم کی فراہمی کے ساتھ طالبعلموں کی ملکی و غیرملکی مطالعتی دوروں اور اسٹوڈنٹس سوسائٹیز کے ذریعے مستقبل کے لیڈرز کے طور پر تربیت کرنے پر زیادہ سے زیادہ توجہ دی جارہی ہے۔