ایمزٹی وی(ایجوکیشن)جامعہ کراچی کے شعبہ تاریخ میں پروفیسر ریاض الاسلام آڈیو ویژول سینٹر کی افتتاحی تقریب کاانعقاد کیا گیا۔ افتتاحی تقریب سے خطاب کرتے ہوئے شیخ الجامعہ کراچی پروفیسر ڈاکٹر محمد قیصر نے کہا کہ اسکالرز کو خراج تحسین پیش کرنے کا بہترین طریقہ یہی ہے کہ ان کی تحقیق اور افکار کو فروغ دیا جائے۔ پروفیسر ڈاکٹر ریاض الاسلام انتہائی اعلیٰ درجے کے محقق اور شفیق اُستاد تھے جن کی خدمات کے اعتراف میں ڈاکٹر ریاض الاسلام آڈیوویژول سینٹر کا قیام لائق تحسین ہے ان کا مزید کہنا تھا جامعہ کراچی کے تحقیقی معیار کو بہتر بنانے میں ان کا کلیدی کردار رہا ہے۔ ایک عظیم مورخ تاریخ کبھی مسخ نہیں کرتا اور غیر جانبدار ہوتاہے پروفیسر ڈاکٹر مونس احمر نے شعبہ تاریخ کو سینٹر کے افتتاح پر مبارکباد دیتے ہوئے کہا کہ ڈاکٹر ریاض الاسلام ایک انتہائی اعلیٰ پائے کے محقق اور ایک شریف النفس انسان تھے۔ان کو تحقیق پر عبور حاصل تھااور ان کی تحریر میں گہرائی ہوتی تھی جو تحقیق کے لئے ناگزیر ہے۔پروفیسر ڈاکٹر جعفر احمد نے کہا کہ پاکستان نے تین عظیم مورخ پیداکئے جن میں پروفیسر اشتیاق حسین قریشی،پروفیسر ڈاکٹر محمود حسین اور پروفیسر ڈاکٹر ریاض الاسلام شامل ہیں۔