ایمزٹی وی(کھیل) بنگلہ دیش پریمیئر لیگ میں شاہد آفریدی نے دو طرفہ اٹیک سے ایک اور فتح رنگپور رائیڈرز کی جھولی میں ڈال دی، بریسال بلز کو دلچسپ مقابلے میں 12 رنزسے ناکامی کامنہ دیکھنا پڑا۔

دوسرے میچ میں ڈھاکا ڈائنا مائٹس نے چٹاگانگ ویکنگز کو 19 رنز سے مات دے دی۔تفصیلات کے مطابق رنگپور رائیڈرز نے پہلے بیٹنگ کرتے ہوئے 6 وکٹ پر175 رنز بنائے، محمد متھن 62 اور لیام ڈاسن 46 رنز کیساتھ نمایاں رہے، شاہد آفریدی نے صرف 10 بالز پر تیز رفتاری سے 22 رنز بٹور کو تماشائیوں کو لطف اندوز کیا، انھوں نے 2 چھکے اور ایک چوکا جڑا۔

تیج الاسلام اور تھشارا پریرا نے 2، 2 وکٹیں لیں۔جواب میں بریسال بلز کی ٹیم 19.4 اوورز میں 163 رنز پر آئوٹ ہوگئی، جیون مینڈس نے سب سے زیادہ 57 رنز بنائے، ان کی بلند پرواز کا خاتمہ شاہد آفریدی نے کیا، دوسرے ٹاپ اسکورر نادف چوہدری بھی 41 رنز پر آفریدی کا ہی شکار ثابت ہوئے، سوہاگ غازی نے 3وکٹیں لیں۔ اس سے قبل کھیلے گئے دن کے پہلے میچ میں ڈھاکا ڈائنامائٹس نے 9 وکٹ پر 148 رنز بنائے، مصدق حسین نے 35 رنز اسکور کیے۔ جواب میں چٹاگانگ 8 وکٹ پر 129 رنزبناسکی۔