ایمز ٹی وی (تجارت) پٹرول اور ہائی اسپیڈ ڈیزل کی قیمتوں میں ایک روپیہ فی لٹر اضافہ کر دیا گیا جبکہ مٹی کے تیل اور لائٹ ڈیزل کی قیمتیں مستحکم رہیں گی۔
گزشتہ روز دبئی میں پریس کانفرنس کرتے ہوئے وفاقی وزیر خزانہ سینیٹر اسحق ڈار نے اپریل کے مہینے کیلئے نئی قیمتوں کا اعلان کیا۔
پٹرول کی قیمت 73 روپے سے بڑھا کر 74 روپے فی لٹر اور ہائی اسپیڈ ڈیزل کی قیمت 82 روپے سے بڑھا کر 83 روپے فی لٹر کر دی گئی ہے۔
وفاقی وزیر خزانہ اسحق ڈار نے کہا کہ حکومت پٹرولیم منصوعات کی قیمتوں میں اضافے کا بوجھ صارفین پر کم ڈال رہی ہے جسکے باعث رواں مالی سال کے دوران حکومت کو97؍ ارب روپے کا بوجھ برداشت کرنا پڑ رہا ہے۔
وزیر خزانہ نے کہا کہ مٹی کے تیل اور لائٹ اسپیڈ ڈیزل کی قیمتیں اوگرا کی جانب سے بڑھائے جانے کی تجویز کے باوجود تبدیل نہیں کی گئیں۔
اوگرا نے پٹرولیم مصنوعات کی عالمی قیمتوں میں اضافہ کے پیش نظر پٹرول کی قیمت میں 2.26 روپے فی لٹر، ہائی اسپیڈ ڈیزل کی قیمت میں 2.04 روپے فی لٹر جبکہ مٹی کے تیل اور لائٹ ڈیزل کی قیمتوں میں بالترتیب 13.76 روپے اور 7.73 روپے فی لٹر اضافہ کی تجویز دی تھی۔
واضح رہے کہ3 ماہ کے دوران پانچویں دفعہ پٹرولیم مصنوعات کی قیمتوں میں اضافہ کیا گیا ہے۔