کراچی: شہر قائد میں آئندہ 24 گھنٹوں کے دوران مطلع جزوی ابر آلود اور سمندری ہوائیں بحال رہنے کا امکان ہے۔
محکمہ موسمیات کے مطابق کراچی میں آج بارش کا کوئی امکان نہیں جبکہ موسم گرم اور ہوا میں نمی کا تناسب کم رہنے سے خشک رہنے کی توقع ہے۔
آج کم سے کم درجہ حرارت 24.5 ڈگری سینٹی گریڈ ریکارڈ ہوا جبکہ زیادہ سے زیادہ درجہ حرارت 37 سے 39 ڈگری سینٹی گریڈ رہنے کا امکان ہے۔
واضح رہے کہ 10 اور 11 اکتوبر کو شہر کے مضافاتی علاقوں میں بارش ہوئی جبکہ چند علاقوں میں بارش کے ساتھ ژالہ باری بھی ہوئی۔
دوسری جانب، مشرقی بحیرہ عرب میں موجود ہوا کا کم دباو مغرب اور جنوب مغرب کی جانب بڑھ گیا۔ ہوا کے کم دباو کا فاصلہ کراچی سے 100 کلومیٹر بڑھ گیا اور سسٹم اس وقت کراچی سے ایک ہزار کلو میٹر کی دوری پر ہے۔ہوا کا کم دباو اگلے 12 گھنٹوں میں ڈپریشن کی شکل اختیار کرسکتا ہے۔
کراچی میں اگلے 3 روز کے دوران موسم گرم و خشک رہنے کا امکان ہے جبکہ ہوائیں زیادہ تر شمال اور شمال مشرق کی جانب سے چلنے کا امکان ہے۔شہر کا زیادہ سے زیادہ درجہ حرارت 36 تا 38 ڈگری کے درمیان ریکارڈ ہوسکتا ہے۔
لاہور: آؤٹ آف فارم مڈل آرڈر بیٹر بابراعظم کوانگلینڈ کےخلاف ملتان ٹیسٹ میں ہوم گراؤنڈ پر بدترین شکست کے بعدآرام دینے کا فیصلہ کرلیا گیا۔
ملتان کرکٹ اسٹیڈیم میں کھیلے گئے پہلے ٹیسٹ میچ میں انگلینڈ نے پاکستان کو اننگز اور 47 رنز سے ہراکر سیریز میں 0-1 کی برتری حاصل کرلی ہے، تاکہ دونوں اننگز میں بابراعظم محض 30 اور 5 رنز کے مہمان ثابت ہوئے۔
بابراعظم نے ٹیسٹ فارمیٹ میں آخری ففٹی پلس اسکور دسمبر 2022 میں اسکور کیا تھا، جس میں نیوزی لینڈ کے خلاف 161 رنز بنائے تھے تاہم مسلسل 20 اننگز میں وہ محض 20.33 کی اوسط سے صرف 366 رنز ہی بنا سکے ہیں۔
دوسرے ٹیسٹ میچ کیلئے پاکستانی ٹیم نے تاحال پلئینگ الیون کا اعلان نہیں کیا ہے تاہم توقع کی جارہی ہے کہ بڑی تبدیلیوں کا امکان ہے، جس میں سینئیر پلئیرز کو بھی آرام کروایا جاسکتا ہے۔
اسی طرح ملتان میں شیڈول دوسرے ٹیسٹ کیلئے 2 اسپنرز کو میدان میں اُتارا جاسکتا ہے تاہم چیئرمین پی سی بی محسن نقوی کی منظوری کے بعد قومی ٹیم کا اعلان ہوگا۔
کیلیفورنیا: ویڈیو اسٹریمنگ پلیٹ فارم یوٹیوب شارٹس میں نئے ’سیو‘ کے بٹن کی آزمائش کر رہا ہے۔
اس نئے فیچر کو متعارف کرانے کا مقصد صارفین کو ایپ میں اپنے پسندیدہ کلپ تک باآسانی واپس پہنچنا ہے۔
سوشل میڈیا ٹوڈے کے مطابق ’سیو‘ بٹن کی شمولیت کے ساتھ ہی کمپنی کی جانب سے شارٹس کے یوزر انٹرفیس سے ناپسند کرنے والا بٹن بھی ہٹایا جانے والا ہے۔
موجودہ یوٹیوب شارٹس پلیئر پر ’لائیک‘ اور ’ڈِس لائیک‘ کے بٹن دائیں ہاتھ پر اوپر کی جانب موجود ہوتے ہیں۔ لیکن حال ہی میں شروع کی جانے والی آزمائش میں ’سیو‘ بٹن کی جگہ بنانے کے لیے ویڈیو ناپسند کرنے کے لیے استعمال کیے جانے والے بٹن کو ہٹایا جارہا ہے۔
یوٹیوب کے مطابق ڈِس لائیک بٹن کو اب انٹرفیس کی دائیں طرف اوپر کی جانب تین نقطوں والے مینو میں رکھا جائے گا۔
صارفین کسی کلپ کو ناپسند کرنے اور اپنی رائے کا اظہار کرنے کے لیے تین نقطوں والے آپشن کو دبا کر ظاہر ہونے والے مینو سے ان میں سے کسی کا بھی انتخاب کر سکتے ہیں۔
اسلام آباد: معروف اداکارہ صبا قمر پاکستان میں بچوں کے حقوق اور لڑکیوں کو بااختیار بنانےکے لیے یونیسف کے مشن میں شامل ہوگئیں۔
یونیسف نے صبا قمرکوپاکستان میں بچوں کےحقوق کی پہلی قومی سفیر مقررکردیا ہے۔
یہ اعلان بچیوں کے عالمی دن کے موقع پر کیا گیا جس کا مقصد لڑکیوں کے حقوق اور دنیا بھر میں انہیں درپیش مشکلات کے حوالے سے شعور اجاگر کرنا ہے۔
اس موقع پر صبا قمر نے کہا کہ ان کے لیے یونیسف کے مشن کا حصہ بننا بڑے اعزاز کی بات ہے۔
انہوں نے کہا کہ میں جہاں کہیں بھی جاؤں گی سب بچوں کے حقوق کے تحفظ کے لیے ہمارے مشترکہ عزم کی حمایت میں کام کرتی رہوں گی۔
صبا قمر کا کہنا تھا کہ انہوں نے حال ہی میں یونیسف کی ٹیم کے ہمراہ سفر کے دوران بچوں اور خواتین کو درپیش مشکلات کا جائزہ لیا اور یونیسف کی جانب سے اُٹھائے گئے مؤثر اقدامات کی بدولت ان مشکلات میں ہونے والی کمی کا بھی مشاہدہ کیا ہے۔
کراچی: محکمہ موسمیات نے شہر قائد کا موسم مزید تین دن گرم رہنے کی پیشگوئی کی ہے۔
محکمہ موسمیات نے بحیرہ عرب میں ہونے والی سرگرمی کے حوالے سے بتایا کہ ہوا کا کم دباؤ شدت اختیار کرگیا ہے جو کراچی کے جنوب سے 900 کلو میٹر دور ہے۔
محکمہ موسمیات کے مطابق کل تک ہوا کا کم دباؤ مزید شدت اختیار کرکے ڈپریشن بن سکتا ہے تاہم اس سسٹم سے پاکستان کے کسی بھی ساحلی علاقے کو فی الحال کوئی خطرہ نہیں۔
محکمہ موسمیات نے بتایا کہ سسٹم کے زیر اثر آج رات سے 14 اکتوبر تک تھرپارکر سمیت عمرکوٹ، بدین اور سجاول کے اضلاع میں بھی چند مقامات پر آندھی اور گرج چمک کے ساتھ بارش کا امکان ہے۔
دوسری جانب موسم کا حال بتانے والوں نے کراچی کے حوالے سے پیشگوئی کی ہے کہ کراچی کا موسم آئندہ 2 سے 3 دن شدید گرم اور خشک رہنےکا امکان ہے جب کہ اس دوران درجہ حرارت 37 سے 39 ڈگری سینٹی گریڈ تک بڑھ سکتا ہے۔
محکمہ موسمیات کے مطابق آج بھی کراچی کے مضافات میں کہیں کہیں آندھی اور گرج چمک کے ساتھ بارش کی توقع کی جارہی ہے، اس کے علاوہ سندھ کے بیشتر مقامات پر موسم گرم اور خشک رہنے کا امکان ہ
کراچی: سٹی انسٹیٹیوٹ آف ہیلتھ سائنسز کے تحت سرٹیفائیڈ نرسنگ اسسٹنٹ اور سرٹیفائڈ نرسنگ معاون کے لیے ایک اور دو سالہ ڈپلومہ پروگرام کا آغاز کردیا گیا۔
تقرئب کے مہمانِ خصوصی بیرسٹر مرتظیٰ وہاب نےاپنےخیالات کااظہارکرتے ہوئے کہا کہ اس پروگرام کا مقصد کراچی کے طبی اداروں کے لئے جدید ترین تربیت سے آراستہ نرسنگ اسٹاف کی فراہمی ہے جن میں حادثاتی یا ایمرجنسی نرسنگ اور کارڈیک نرسنگ میں مہارت رکھنے والا نرسنگ اسٹاف بھی شامل ہو گا،جس میں شرکت کرنے والوں کو 100 فیصد اسکالرشپ فراہم کی جائیں گی، ان صلاحیتوں کے حامل نرسنگ اسٹاف کی دستیابی سے کے ایم سی اسپتالوں سمیت کراچی کے دیگر سرکاری و نجی اداروں کے تحت چلنے والے اسپتالوں میں طبی سہولیات کی فراہمی کا معیار بہتر ہوگا اور شہریوں کو جدید اور معیاری علاج کی سہولیات دستیاب ہوں گی۔
انہوں نے کہا کہ نرسنگ اسٹاف کو تربیت فراہم کرنے والے کے ایم سی انسٹیٹیوٹ آف ہیلتھ سائنسز کو پاکستان نرسنگ اینڈ مڈوائفری کونسل سے رجسٹرڈ اور سندھ نرسز ایگزامنیشن بورڈ سے اس کا الحاق کرایا گیا ہے تاکہ نرسنگ سے متعلق ان اہم اداروں کی رہنمائی سے ڈپلومہ پروگرام کے شرکاء-04 کے لئے بہترین تربیت کی فراہمی کو یقینی بنایا جاسکے۔
انہوں نے کہا کہ کراچی کے مختلف اسپتالوں میں کام کرنے والا رجسٹرڈ نرسنگ اسٹاف بھی اس پروگرام کے تحت ایک سالہ پوسٹ بیسک اسپیشلٹی پروگرام کے لیے اپلائی کرسکتا ہے جس کے دوران انہیں حادثاتی اور ایمرجنسی نرسنگ کے علاوہ کارڈیک نرسنگ کی جدید تربیت فراہم کی جائے گی۔
انہوں نے کہا کہ کراچی میں نرسنگ کے مقدس پیشے سے وابستہ افراد خصوصاً نوجوان طالب علم اس پروگرام سے فائدہ اٹھائیں اور نرسنگ کی سند اور جدید تربیت حاصل کر کے اپنے مستقبل کو روشن بنائیں، انہوں نے کہا کہ پاکستان میں ہی نہیں بلکہ پوری دنیا میں نرسنگ اسٹاف کی ضرورت ہے اور نرسنگ کی جدید تربیت حاصل کرنے والے نوجوانوں کے لیے روزگار کے مواقع دستیاب ہیں، بلدیہ عظمیٰ کراچی کے تحت نرسنگ کا تربیتی پروگرام نوجوانوں کو ہنرمند بنانے اور روزگار کی فراہمی میں ان کی مدد کرنے کی پالیسی کا حصہ ہے جسے کامیاب بنانے کے لیے ہرممکن اقدامات کئے جائیں گے ۔
کراچی: وفاقی اردو یونیورسٹی کی مالی مشکلات او ر انتظامی بحران کی ذمہ داری کا تعین کرنے کے لئے وفاقی وزارت تعلیم نے فیکٹ فائنڈنگ شروع کردی۔
وفاقی وزرات تعلیم و پروفیشنل ٹریننگ نے اصغر کو جوائنٹ ایڈیشنل سیکریٹری تعینات کردیا گیا ہے ۔ جوائنٹ ایڈیشنل سیکریٹری علی اصغر نے گزشتہ روز اردو یونیورسٹی کا دورہ کیا۔
اس دوران شیخ الجامعہ پروفیسر ڈاکٹر ضابطہ خان موجود نہیں تھے ، انہوں نے جوائنٹ ایڈیشنل سیکریٹری علی اصغر سے ملاقات کے لئے کراچی کیمپس کے دونوں انچارج کیمپس کو مقرر کیا ۔
جوائنٹ سیکریٹری نے مختلف قانونی فورم کے ذریعے ہونے والی تقریوں اور ٹائم پے اسکیل سے متعلق بھی معلومات حاصل کیں اور معلوم کیا کہ کیسے دو گریڈ 17 کے منتظم کو اسسٹنٹ رجسٹرار تعینات کردیا گیا ہے جبکہ اس وقت اسسٹنٹ رجسٹرار گریڈ 17کی اسامی بھی موجود نہیں تھی اور بغیر اشتہار کے دو ملازمین کو نوازنے کے لئے سینڈیکیٹ سے منظوری حاصل کرکے اسسٹنٹ رجسٹرار کی انتظامی پوسٹ پر تعینات کردیا گیا جبکہ یہ ترقیاں سینیٹ کی منظوری سے مشروط تھیں اس کے باوجود تنخواہوں اور ہاؤس سیلنگ کی مد میں لاکھوں روپے جاری کردیے گئے جبکہ شکایات کے مطابق اس وقت 58 منتظم جامعہ میں موجود ہیں اور ان سب منتظم اور دیگر ملازمین کو اشتہار کی بنیاد پر موقع کیوں فراہم نہیں کیا گیا۔
پنجاب : پنجاب ایجوکیشن اتھارٹیز میں انتظامی افسروں کی تقرری کیلئےدوبارہ درخواستیں طلب کر لی گئیں
درخواستیں طلب کرنے کی آخری تاریخ20اکتوبر مقررکی گئی ۔
ایجوکیشن اتھارٹیز میں ڈسٹرکٹ اورڈپٹی ڈسٹرکٹ ایجوکیشن افسروں کی تقرری ٹیسٹ کے بعد کی جا ئے گی، ایک گریڈ کم والے اساتذہ بھی درخواست دے سکتے ہیں۔
گریڈ 19کیلئے 18اور گریڈ 18کیلئے گریڈ 17کے افسر بھی درخواست دے سکیں گے ، آن لائن درخواستیں 20اکتوبر تک جمع کر ائی جا سکیں گی۔
اسلام آباد: وفاقی دارالحکومت میں چار اکتوبر کو ہونے وا لے سیاسی پارٹی کے احتجاج کو روکنے کیلئے حکومت کی جانب سے لگائی گئی رکاوٹوں اور موبائل فون کے سگنلز بند کرنے سے سینکڑوں طلبا و طالبات فیڈرل بورڈ کے تحت میٹرک کے پیپر نہ دے سکے
جبکہ فیڈرل بورڈ کی جانب سے کوئی متبادل تاریخ نہ دینے کی وجہ سے پیپر میں نہ پہنچ پانے والے بچوں کا سال ضائع ہونے کا خدشہ پیدا ہو گیا ہے۔
اس حوالے سے وفاقی تعلیمی بورڈ کے کنٹرولر امتحانات کا کہنا ہے کہ امتحانات چونکہ پورے ملک اوربیرون ملک بھی ہو رہے تھے اس لیے بہت سے بچوں نے امتحان دیا ہے ۔
چار اکتوبر کو ہوم اکنامکس کا پرچہ تھا جبکہ پانچ اکتوبر کو بیالوجی اور کمپیوٹر کے پریکٹیکل جبکہ اسلامیات کا پرچہ تھا تاہم جمعہ 4اکتوبراور ہفتہ پانچ اکتوبر کو پی ٹی آئی احتجاج کے پیش نظر حکومت نے تمام راستے بند کردیئے جبکہ انٹرنیٹ اور موبائل سروس بھی مکمل بند رکھی گئی اس کے باوجود امتحانات ملتوی نہیں کئے گئے جس کے باعث سینکڑوں طلبہ امتحانی ہال نہ پہنچ سکے ۔
طلبا و طالبات اور والدین نے فیڈرل بورڈ اور دیگرمتعلقہ حکام سے اپیل کی ہے کہ ان بچوں کو متبادل تاریخ میں پیپر دینے کی اجازت فراہم کی جائے ۔
محکمہ صحت نے پنجاب کے میڈیکل و ڈینٹل کالجز کے لئے داخلہ پالیسی جاری کردی۔
صوبائی کابینہ کی منظوری کے بعد محکمہ سپیشلائز ہیلتھ کیئر نے نوٹیفکیشن جاری کردیا۔
جس کے مطابق اسلام آباد کے طلبا کیلئے پنجاب میں ایم بی بی ایس کا اوپن میرٹ ختم کرتے ہوئے گجرات، سرگودھا اور ڈی جی خان کے میڈیکل کالجوں میں صرف3سیٹیں مختص کردی گئیں۔
اس حوالے سے اسلام آباد کے طلبا میں تشویش پائی جارہی ہے ۔ نارووال میڈیکل کالج کی 100 سیٹوں پر بھی داخلے ہونگے ۔سرکاری میڈیکل کالجز میں داخلوں کیلئے آن لائن درخواستیں 21 اکتوبر سے 4 نومبر جبکہ پرائیویٹ کالجز میں 5 سے 19 نومبر تک درخواستیں وصول کی جائیں گی۔
سرکاری ڈینٹل کالجز میں داخلے کی آن لائن درخواستیں 20نومبر سے 4 دسمبر،پرائیویٹ کالجز کی درخواستیں 5 سے 19 دسمبر تک وصول کی جائیں گی۔یکم فروری 2025 سے ایم بی بی ایس جبکہ یکم مارچ سے بی ڈی ایس کی کلاسز کا آغاز کیا جائیگا۔