لاہور: ویسٹ انڈیزاورپاکستان کے درمیان ون ڈےانٹرنیشنل سیریزکےشیڈول جاری کردیا گیا۔
آئی سی سی مینز کرکٹ ورلڈکپ سپر لیگ میں شامل تین میچز 8، 10 اور 12 جون کو کھیلے جائیں گے۔ سیریز میں شامل تینوں میچز پنڈی کرکٹ اسٹیڈیم راولپنڈی میں کھیلے جائیں گے۔ مہمان ٹیم سیریز میں شرکت کے لیے 5 جون کو اسلام آباد پہنچے گی۔
واضح رہے کہ ویسٹ انڈین ٹیم دسمبر میں پاکستان آئی تھی اور یہ تینوں ون ڈے انٹرنیشنل میچز دسمبر 2021 میں ویسٹ انڈیز کے دورہ پاکستان کا حصہ تھے۔ لیکن مہمان کیمپ میں کوویڈ 19 کیسز سامنے آنے کے باعث بمشکل ٹی ٹوئنٹی سیریز ہی مکمل ہوئی اور اس وقت یہ ون ڈے میچز ملتوی کردیے گئے تھے۔
آئی سی سی لیگ میں شامل ان میچز کو ورلڈکپ کوالیفائرزکا درجہ حاصل ہے۔
لاہور: پنجاب یونیورسٹی لاہور نے سالانہ امتحانات برائے2022 کاشیڈول جاری کردیا۔
جامعہ کے جاری کردہ اعلامیہ کے مطابق ایم اے، ایم ایس سی سال اول و دوم ،تین سالہ ایل ایل بی پارٹ ون اورٹو سپلیمنٹری پارٹ تھری، پانچ سالہ ایل ایل بی پارٹ ون ، ٹو، تھری، فوراور فائیو سپلیمنٹری امتحانات 2021کا آغاز 11مئی سے ہوگا،
جبکہ بی ایس سی پارٹ سال اول و دوم کے سالانہ امتحانات 27جولائی اور ایم اے، ایم ایس سی پارٹ ون اور ٹو، بی کام پارٹ ون اور ٹو کے سالانہ امتحانات 25اگست سے شروع ہونگے۔
مانیٹرنگ ڈیسک : معروف سرچ انجن گوگل پرصارفین جلد ہی گوگل کےذریعے ڈاکٹر سے اپنی اپائنٹمنٹ لےسکیں گے۔
غیر ملکی میڈیا رپورٹس کے مطابق گوگل نے اعلان کیا ہےکہ وہ ایک نئے سرچ فیچر کا تجربہ کرے گا جس کی مدد سے صارفین گھر بیٹھے آسانی سے اپنے ڈاکٹر سےاپائنٹمنٹ لے سکیں گے۔
رپورٹس کے مطابق گوگل نے گزشتہ دنوں اپنے دوسرے سالانہ ہیلتھ ایونٹ’ دی چیک اپ‘ کے دوران اس پیش رفت کا اعلان کیا۔
کمپنی کے مطابق یہ فیچر اب بھی تیار ہو رہا ہے تاہم گوگل جلد ہی یہ سہولت پورے امریکا میں لانچ کرنے کا منصوبہ بنارہا ہے۔
اس کے علاوہ گوگل نے عالمی آرٹیفیشل انٹیلیجنس کے اقدامات پر تحقیق کرنے کے منصوبوں کا بھی اعلان کیا۔
کمپنی نے اپنی الٹراساؤنڈ ٹیکنالوجی کی تحقیق کے لیے نارتھ ویسٹرن میڈیسن کے ساتھ شراکت داری کی ہے۔
رپورٹس کے مطابق گوگل اس بات پر بھی تحقیق کر رہا ہے کہ آنکھوں کی تصاویر مختلف طبی حالات کی شناخت میں کس طرح مدد کر سکتی ہیں۔
اسلام آباد: علامہ اقبال اوپن یونیورسٹی نے دوسرے مرحلے کے داخلہ جاری رکھنے کا اعلان کیا ہے۔
تفصیلات کے مطابق علامہ اقبال اوپن یونیورسٹی سمسٹر بہار کے دوسرے مرحلے کے داخلے 18 اپریل تک جاری رہیں گے۔
جن پروگرامز میں داخلے جاری رہیں گے ان میں ایم اے/ایم ایس سی/ پوسٹ گریجویٹ ڈپلومہ پروگرامز/بی اے(ایسوسی ایٹ ڈگری(، بی کام(ایسو سی ایٹ ڈگری), چارسالہ بی بی اے، چار سالہ بی ایس پروگرامز اور سرٹیفیکٹ کورسز کے علاوہ تربہت اساتذہ پروگرامز (ایک سالہ ایم ایڈ،ڈیڑھ /ڈھائی اور چار سالہ بی ایڈ پروگرامز) بھی شامل ہیں۔
لاہور : آسٹریلیا کے خلاف قومی ٹیم کے اوپننگ بلےبازفخرزمان کاکہناہےکہ آسٹریلیاکی ٹیم میں بڑے ناموں کےنہ ہونےسےپاکستان کوفائدہ ضرورہوسکتا ہے۔
انہوں نےتمام وائٹ بال سیریز جیتنے کی امید ظاہر کی ہے۔
آن لائن پریس کانفرنس کرتے ہوئےفخر زمان نے کہا کہ خوشی ہےکہ وائٹ بال کرکٹ میں اچھی فارم ہے اور رنز ہو رہے ہیں اس سیریز میں ہم پورے پوائنٹ لینے کی کوشش کریں گے تاکہ رینکنگ بہتر ہو۔
انہوں نے کہا کہ آسٹریلیا کے بڑے نام کھیلتے تو اچھا ہوتا، نہ ہونے سے فرق پڑتا ہے تاہم بڑے کھلاڑیوں کی غیر موجودگی میں بھی آسٹریلین ٹیم کو ہلکا نہیں لیں گے اور ریلیکس نہیں ہوں گے ، مجھے امید ہے کہ وائٹ بال سیریز کے تمام میچز ہم جیتیں گے۔آسٹریلیا کی ٹیم میں بڑے ناموں کے نہ ہونے سے پاکستان کو فائدہ ضرور ہو سکتا ہے،
فخر زمان کا کہنا تھا کہ ہوم گراؤنڈ کا ہمیں ایڈوانٹیج ضرور ہے لیکن آسٹریلیا کا کمبی نیشن اچھا ہے،مہمان ٹیم میں سب اچھے کھلاڑیوں کو شامل کیاگیا ہے اور ان کے نئے کھلاڑی بھی لیگز کھیلتے ہیں۔
پچز پر بات کرتے ہوئے انہوں نے کہا کہ سیریز کے لیے جو پچز تیار کی گئی ہیں وہ بہت اچھی ہیں، لاہور میں پچز پر رنز اچھے بنتے ہیں اور 300 رنز کا ٹارگٹ بہت اچھا ہوگا۔
لاہور: آسٹریلوی کپتان ایرون فنچ نے کہا ہے کہ رواں برس ٹی ٹوئنٹی ورلڈ کپ کے لیے ایک اچھا کمبی نیشن بنانا چاہتے ہیں
میں مہمان ٹیم کے کپتان ایرون فنچ نےپری میچ ورچوئل پریس کانفرنس میں کہاہے کہ نوجوان کھلاڑیوں پر مشتمل ٹیم کے ساتھ اچھی پرفارمنس دینے کی کوشش کریں گے،پاکستان کے خلاف ون ڈے سیریز میں اچھے آغاز کے خواہشمند ہیں پاکستانی میں پہلی بار آنے کا موقع ملا ہے اور سیریز شروع ہونے کا بےتابی سے متنظر ہوں۔
ایرون فنچ نے کہا کہ مچل مارش گزشتہ روز پریکٹس میں انجری کا شکار ہوئے ہیں، ان کی دستیابی کا فیصلہ اسکین رپورٹ کی بنیاد پر ہوگا۔
آسٹریلوی کپتان نے کہا کہ بابر اعظم، محمد رضوان اور شاہین شاہ آفریدی جیسے ورلڈ کلاس کرکٹرز پاکستانی ٹیم کا حصہ ہیں، شاہین شاہ آفریدی اچھی سوئنگ کرتے ہیں۔ حارث روف، حسن علی اور عثمان قادر بھی بہترین بولنگ کرنا جانتے ہیں۔
انہوں نے کہا کہ یہ درست ہے کہ دسمبر 2020 کے بعد ون ڈے میچز پہلی بار کھیلنے جا رہے ہیں لیکن بھرپور تیاری کے ساتھ میدان میں اتریں گے۔ ایشیائی پچز بیٹنگ کے لیے زیادہ تر سازگار ہوتی ہیں، اس لیے کوشش ہوگی کہ اچھی کرکٹ کھیل کر برتری ثابت کریں۔
ایرون فنچ نے کہا کہ آخری ٹیسٹ میں پیٹ کمنز نے ڈیکلیئریشن کا دلیرانہ فیصلہ کیا اور ٹیسٹ سیریز میں کامیابی سے مورال میں اضافہ ہوا ہے۔ اسٹیو اسمتھ کی کمی محسوس کریں گے ایلکس کیری، میکڈر موٹ اور کرس گرین سے بڑی امیدیں وابستہ ہیں، ون ڈے ورلڈکپ ابھی دور ہے لیکن یہ سیریز بھی اس کی تیاری میں مدد دے گی۔
آسٹریلوی کپتان کا کہنا تھا کہ رواں برس ٹی ٹوئنٹی ورلڈ کپ کے لیے ایک اچھا کمبی نیشن بنانا چاہتے ہیں، پاکستان میں صرف ایک میچ ہے تاہم سری لنکا میں زیادہ ٹی ٹوئنٹی میچز ہیں جس سے تیاری کا اچھا موقع ملے گا۔
نئی دہلی: بھارتی ریاست کرناٹک میں واٹس ایپ پریوم پاکستان کی مبارک باد دینےپر25سالہ طالبہ کو گرفتار کرلیا۔
عالمی خبر رساں ادارے کے مطابق بھارتی ریاست کرناٹک میں پولیس نے 25 سالہ ہندو طالبہ کو ایک واٹس ایپ میسیج کی بنیاد پر حراست میں لے لیا ہے۔
طالبہ نے 23 مارچ کو یوم پاکستان کے موقع پر واٹس ایپ پر لکھا تھا کہ خدا ہر قوم کو امن، اتحاد اور ہم آہنگی سے نوازے۔ لڑکی کے اس اسٹیس پر ایک انتہا پسند ہندو نے تھانے میں مقدمہ اندراج کی درخواست دائر کی۔
درخواست میں مؤقف اختیار کیا گیا کہ طالبہ نے پاکستان کے یوم جمہوریہ پر نیک خواہشات کا پیغام دے کر دو کمیونیٹیز کے درمیان دشمنی پیدا کرنے کی کوشش کی ہے، گرفتار طالبہ کو ایک دن کے بعد ضمانت پر رہا کردیا گیا تھا تاہم اب مقدمہ کا ٹرائل عدالت میں ہوگا۔
کراچی: سرسیدیونیورسٹی آف انجینئرنگ اینڈ ٹیکنالوجی کاپچیسواں کانووکیشن روایتی جوش وجذبےسےمنایاگیا.
جس میں مختلف مکاتبِ فکر سے تعلق رکھنے والی اعلیٰ علمی شخصیات کے علاوہ معززین، فیکلٹی و طلباء کی ایک کثیر تعداد نے شرکت کی ۔ تقریب کے مہمانِ خصوصی ممتاز تاجر اور سماجی رہنما بشیر جان محمد تھے ۔
اس یادگار موقع پر خطاب کرتے ہوئے چانسلر جاوید انوار نے کہا کہ کوویڈ کی وجہ سے جہاں معاشرتی و سماجی ڈھانچہ میں ناگزیر تبدیلیاں رونما ہوئی ہیں ، وہاں تعلیمی نظامِ میں بھی ایک بڑی تبدیلی آئی ہے اور آن لائن ایجوکیشن وقت کی ایک اہم ضرورت بن گیا ۔ دیگر اصلاحات کے علاوہ جامعہ سرسید میں ’کیمپس مینجمنٹ سسٹم‘ متعارف کرایا گیا اور شعبہ انفارمیشن ٹیکنالوجی کو عصرِ حاضر کے تقاضوں کے مطابق جدید شکل دی گئی ۔
انھوں نے کہا کہ اب جامعات کا کام طلباء کو صرف ڈگری دینے تک محدود نہیں رہا بلکہ طلباء کو صنعت اور معیشت سے جوڑنے کی ذمہ داری بھی جامعات پر عائد ہوتی ہے ۔ممتاز سائنسداں محسنِ پاکستان ڈاکٹر عبدالقدیر خان کو بعد از مرگ سرسید احمد خان پِیس ایوارڈ Sir Syed Ahmed Khan Peace Award سے نوازنے کے عزم کا اظہار کرتے ہوئے انھوں نے کہا کہ قدیر خان نے اپنی علمیت، قابلیت اور ٹیکنالوجی کی مہارت سے پاکستان کو ناقابلِ تسخیر بنادیا ۔ اس موقع پر انھوں نے اعلان کیا کہ سرسید یونیورسٹی میں ڈاکٹر عبدالقدیر خان چیئر قائم کی جائے گی ۔
وائس چانسلر پروفیسر ڈاکٹرولی الدین کاکہناتھا کہ آج کا دن آپ کے لیے ایک یادگاردن ہے اور آپ کی زندگی کے سفر میں ایک اہم سنگِ میل رکھتا ہے ۔ اب آپ عملی زندگی کے دشوارگزار راستے پر قدم رکھنے جارہے ہیں جہاں آپ کو لاتعداد چیلنجز کا سامنا کرنا ہوگا جن سے نمٹنے کے لیے آپ کی قابلیت اور مہارت کام آئے گی اورتجربات سے آپ بہت کچھ سیکھیں گے ۔ ہر شخص کے اپنے خواب ہوتے ہیں جو آپ کو کامیابی کی بلند سطح پر لے جاتے ہیں اور زندگی کو بامقصد بناتے ہیں ۔
اس موقع پر سرسید یونیورسٹی کی گزشتہ سال کی کارکردگی پر مبنیرپورٹ پیش کرتے ہوئے انھوں نے کہا کہ سرسید یونیورسٹی نے نیشنل ہوسٹ کے طور پر وزارتِ انفارمیشن ٹیکنالوجی اور اسپائرASPIREکے اشتراک سے نیشنل آئیڈیاز بینک کا آغاز کیا جس کا افتتاح صدرِ پاکستان عارف علوی نے کیا تھا ۔ پہلے مرحلے کی اختتامی تقریب سرسید میموریل ھال اسلام آباد میں منعقد ہوئی جس کے مہمانِ خصوصی صدرِ پاکستان عارف علوی تھے ۔
اس موقع پر تقریبا گیارہ سو سے زائدطلباء و طالبات کو ڈگریاں تفویض کی گئیں اور امتیازی نمبروں سے اول، دوئم اور سوئم پوزیشن حاصل کرنے والے طلباء و طالبات میں بالترتیب طلائی، چاندی اور کانسی کے تمغے تقسیم کئے گئے ۔
لاہور: پی سی بی ملتوی ہونے والی پاکستان اورویسٹ انڈیزکی ون ڈےسیریزجون میں کرانے کی تیاری کرنے لگا۔
ذرائع کے مطابق پی سی بی ملتوی ہونے والی پاکستان اور ویسٹ انڈیز کی ون ڈے سیریز جون میں کرانے کی تیاری کر رہا ہے، اس ضمن میں کیریبیئن بورڈ کے ساتھ بات چیت جاری ہے، میچز ممکنہ طور پر کراچی اور راولپنڈی میں ہوں گے۔
یاد رہے کہ ویسٹ انڈین ٹیم دسمبر میں پاکستان آئی تھی، کورونا کیسز سامنے آنے کے بعد بمشکل ٹی ٹوئنٹی سیریز ہی مکمل ہوئی، ون ڈے میچز ملتوی کردیے گئے تھے،آئی سی سی لیگ میں شامل ان میچز کو ورلڈکپ کوالیفائرز کا درجہ حاصل ہے۔
کراچی: جامعہ کراچی کے شعبہ مالیات کی غفلت منظر عام پر آگئی،
مستحق طلبا کے لیے احساس اسکالر شپس کی رقم تنخواہوں کی ادائیگی میں خرچ کردی گئی
ایچ ای سی ذرائع کا کہنا ہے کہ احساس پروگرام اسکالر شپ کی رقم، تنخواہوں کی ادائیگی اور لیو ان کیش منٹ پر خرچ کی گئی ہے۔
ذرائع کا کہنا ہے کہ ایچ ای سی اور احساس پروگرام اسکالر شپ سمیت دیگر امور سے متعلق 10 کروڑ روپے سے زائد کی رقم موجود تھی۔انہوں نے مزید بتایاکہ متعدد طالب علموں کے نام ایچ ای سی کی نیڈ بیس اسکالر شپ اور احساس پروگرام اسکالر شپ میں شامل ہے۔اسکالر شپس کے حوالے سے ڈائریکٹر فنانس آفیسر کو ایک خط بھی لکھا گیا تھا، شعبہ مالیات کو لکھے گئے خط میں فنڈز کے غلط استعمال اور اسکالر شپس نہ دینے کا تذکرہ کیا گیا ہے۔
ذرائع کا کہنا ہے کہ ایچ ای سی کو سالانہ 350 ملین سے زائد کی رقم طلبا کے لیے جاری کی گئی، ایچ ای سی اور احساس پروگرام کی رقم طلبا کو منتقل نہ ہوسکی۔ احساس پروگرام سے 40 ہزار روپے فی طالب علم ادا کیے جانے تھے۔ذرائع کا مزید کہنا ہے کہ احساس پروگرام فیز 1 اور فیز 2 کی 260 اسکالر شپس کی رقم 1 کروڑ سے زائد ہے۔