ایمز ٹی وی (فارن ڈیسک) شام میں گزشتہ 5 برسوں سے جاری خانہ جنگی میں پہلی بار جنگ بندی پر عمل درآمد شروع ہو گیا ہے۔ غیر ملکی خبر رساں ادارے کے مطابق شام میں کارروائیاں نہ کرنے کے حوالے سے امریکا اور روس کے درمیان معاہدے کے بعد 5 سالہ خانہ جنگی میں پہلی مرتبہ جنگ بندی پر عمل درآمد شروع ہو گیا ہے تاہم جنگ بندی کا اطلاق النصرہ فرنٹ اور داعش کے لئے نہیں ہو گا۔ 

اقوام متحدہ کی سلامتی کونسل نے بھی شام میں جنگ بندی کی حمایت کر دی ہے۔ شامی حکومت اور مخالف دھڑوں کے درمیان امن مذاکرات 7 مارچ کو دوبارہ شروع ہوں گے جب کہ سعودی عرب نے داعش کے خلاف کارروائی کے لئے لڑاکا طیارے ترکی بھیج دیئے ہیں۔واضح رہے کہ چند روز قبل ہی امریکا اور روس نے شام میں خانہ جنگی پر اتفاق کیا تھا جس کا پاکستان سمیت دنیا بھر کے ممالک نے خیر مقدم کیا تھا۔