ایمزٹی وی (اسلام آباد)وزیر اعظم نوازشریف کی صاحبزادی مریم نواز آج جے آئی ٹی میں پیش ہونگی جن سے اظہار یکجہتی کیلئے لیگی کارکن لاہور سے اسلام آباد کیلئے روانہ ہو گئے ۔
میڈیا ذرائع کے مطابق اپنے قائد اور وزیر اعظم پاکستان کی صاحبزادی مریم نواز سے اظہار یکجہتی کیلئے لیگی کارکنوں کی بڑی تعداد صبح سویرے اسلام آباد کیلئے روانہ ہو ئی ہے جنہیں روانگی سے پہلے لاہور کا روایتی ناشتہ بھی کرایا گیا ۔
لاہور کے علاقے جوہر ٹاﺅن میں کھوکھر پیلس میں مسلم لیگ ن کے کارکنوں کی بڑی تعداد جمع ہوئی، لیگی کارکنوں نے مریم نواز اور پارٹی کی قیادت کے حق میں نعرے لگائے۔
اسلام آباد روانگی سے قبل کارکنوں کی حلوہ پوری اور نان چنے سے تواضع کی گئی، کارکنوں نے جی بھر کر ناشتہ کیا، ان کا کہنا تھا کہ وہ دنیا کو بتا دیں گے کہ مریم نواز اکیلی نہیں پوری قوم ان کے ساتھ ہے۔
کارکنوں کا کہنا تھا کہ مریم نواز نے جے آئی ٹی کے سامنے پیش ہو نے کا فیصلہ کر کے ثابت کر دیا کہ وہ بہادر باپ کی نڈر بیٹی ہیں۔ مریم نواز سمیت شریف فیملی جے آئی ٹی میں سرخرو ہو گی۔