ایمز ٹی وی(لاہور)صوبے کے مختلف علاقوں میں دھند کے باعث ہونے والے ٹریفک حادثات میں 17 افراد جان کی بازی ہارگئے‘ پنڈی بھٹیا ں پر پندرہ گاڑیاں ٹکرا گئیں دس افراد ہلاک متعدد زخمی ہوگئے۔

پنڈی بھٹیاں میں موٹروے سکھیکی کےقریب دھند کےباعث پندرہ مسافر گاڑیاں آپس میں ٹکرا گئیں خطرناک حادثہ میں متعدد افراد جان کھو بیٹھے ۔ریسکیو ذرائع کے مطابق حادثے کے نتیجے میں 70 سے زائد افراد زخمی بھی ہوئےجنہیں طبی امداد کے لیے اسپتال منتقل کردیا گیا ہے۔

دوسری جانب فیصل آباد میں جھنگ روڈ پرگاڑیوں میں تصادم میں دو افراد جاں بحق اور چھ زخمی ہوگئے اور سدھار بائی پاس کے قریب لوڈر اور ٹر ک میں ٹکر سے دس افراد زخمی ہوگئے ہیں۔واضح رہے کہ سردیوں میں پنجاب میں دھند کے باعث حادثات میں بے پناہ اضافہ ہوجاتا ہے ۔

لاہور سمیت پنجاب بھر میں دھند کے باعث حد نگاہ 20 میٹر تک رہ گیا ہے جس کے باعث شہریوں کو شدید مشکلات کا سامنا ہے۔موٹر وے حکام نے لاہور سے پنڈی بھٹیاں تک اور پنڈی بھٹیاں سے فیصل آباد تک موٹر وے کو ہر قسم کی ٹریفک کے لیے بند کر دیا ہے۔

دوسری جانب محکمہ موسمیات نے اس دھند کو سموگ یعنی ’گرد آلود دھند‘ کا نام دیا ہے۔ محکمہ موسمیات کے مطابق سموگ کا سلسلہ آئندہ 5 روز تک جاری رہنے کا امکان ہے