ایمز ٹی وی(کراچی)وزیر داخلہ سندھ سہیل انور خان سیال نے 70 ویں جشن آزادی پاکستان کے حوالے سے احکامات جاری کیے ہیں کہ یوم آزادی کے موقع پر صوبے بھر بالخصوص کراچی میں سیکورٹی کے غیر معمولی اقدامات اختیار کئے جائیں،اپنے دفتر سےجاری کی جانے والی ہدایات میں کہا گیا ہے کہ جشن آزادی کے موقع پر مزار قائد، تفریحی مقامات ، مرکزی شاہراہوں پر مختلف ریلیوں اور جلوسوں کے انعقاد کے خواہشمند تنظیموں ، تعلیمی اداروں اور این جی اوز سے شرکا کی باقاعدہ فہرستیں او تفصیلات طلب کرکے زونوں اور رینج کی سطح پر حفاظتی انتظامات کو ترتیب دیا جائے۔
وزیر داخلہ کے ترجمان کے مطابق یوم آزادی کے حوالے سے منعقد ہونے والے اجتماعات اور پروگراموں کی براہ راست نگرانی ایس ایس پیز کریں اور متعلقہ ایس ڈی پی اوز ڈیوٹی پر تعینات اہلکاروں کی بریفنگ اور ایس ایچ اوز کی رہنمائی کریں گے۔ وزیر داخلہ نے مذید کہا ہے کہ تھانہ جات کے حوالے سے تمام سرکاری و نیم سرکاری عمارتوں ، سفارت خانوں ، بس ٹرمینلز، شاپنگ سینٹرز، فلائی اوورز، ریلوے اسٹیشنوں، بس اڈوں سمیت اسکولوں اور کالجوں میں ہونے والی جشن آزادی کی تقریبات کی سیکورٹی کا فول پروف بندوبست کیا جائے اور یوم آزادی کی ریلیوں کے دوران اسپیشل برانچ اہلکاروں کی موجوگی یقینی بنایا جائے۔
سہیل انور سیال نے ہدایت جاری کرتے ہوے کہا کہ اسنیپ چیکنگ، پکٹنگ اور گشت کے عمل میں تیزی کے ساتھ مشکوک اور مشتبہ افراد پر کڑی نگاہ رکھی جائے اور مزار قائد سمیت قومی ورثے کی عمارتوں کو بم ڈسپوزل اسکواڈ سے کلئیر کروایا جائے اور ٹریفک کی روانی بلا تعطل جاری رکھنے کے لئے یقینی اقدامات کیے جائیں۔وزیر داخلہ نے ہدایت کی ہے کہ جشن آزادی کے موقع پر شہر کے تمام علاقوں بالخصوص مختلف تنظیموں کی جانب سے منعقد کئے جانے والے پروگراموں کے مقامات پر سیکورٹی کے مؤثر انتظامات کو یقینی بنایا جائے۔