ایمز ٹی وی (کراچی)پاک سرزمین پارٹی کے چیئرمین سید مصطفیٰ کمال نے پاک سر زمین پارٹی کے 27 نکاتی منشور کا اعلان کرتے ہوئے کہا ہے کہ پارلیمانی نظام ناکام اور فرسودہ ہوچکا ہے اب ملک کو جمہوری صدارتی نظام کی ضرورت ہے۔ نظام کی تبدیلی کے بغیر ملک ترقی نہیں کرسکتا، یہی وجہ ہے کہ جن سیاسی جماعتوں کی وفاق اور صوبوں میں حکومتیں ہیں، وہ سب احتجاج کر رہی ہیں، ہم نے اپنے منشور میں گڈ گورننس، تعلیم، بلدیاتی حکومتوں مضبوط سیکورٹی نظام اور صحت کو ترجیح دی ہے۔ ہم ثابت کریں گے کہ پی ایس پی روایتی، سیاسی و انتظامی نظام میں بنیادی اور انقلابی تبدیلیوں کی خواہاں ہے۔ ان خیالات کا اظہار انہوں نے پیر کو مقامی ہوٹل میں پاک سر زمین پارٹی کے منشور کے اجراء کے موقع پر جس کا عنوان ’ترقی کا سفر، عزت انصاف، اختیار‘ تھا۔ اس موقع پر پاک سرزمین پارٹی کے صدر انیس احمد قائمخانی، انیس احمد ایڈووکیٹ، وسیم آفتاب، اشفاق منگی، ڈاکٹر صغیر احمد، سید خاور مہدی اور دیگر موجود تھے۔