ایمزٹی وی( کھیل) پاکستان نے ٹیسٹ رینکنگ میں روایتی حریف بھارت کو پیچھے چھوڑتے ہوئے ٹیسٹ رینکنگ میں پہلی پوزیشن حاصل کرلی ہے۔
دنیائے ٹیسٹ کرکٹ میں پاکستان کی حکمرانی کا سورج طلوع ہوگیا، پاکستان کرکٹ ٹیم نے بھارت سے ٹیسٹ رینکنگ میں پہلی پوزیشن چھین لی ہے اورقومی ٹیم ایک سو گیارہ پوائنٹس کے ساتھ ٹیسٹ رینکنگ میں ٹاپ پوزیشن پر براجمان ہوگئی ہے۔
بھارت کو پہلی پوزیشن بچانے کیلئے ویسٹ انڈیز سے آخری ٹیسٹ جیتنا تھا، لیکن پورٹ آف اسپین میں بارش بھارتی آرمان بہا لے گئی،جس کے بعد شاہینوں نے بھارتی سورماؤں سے پہلی پوزیشن چھین لی۔
آئی سی سی ٹیسٹ رینکنگ کے مطابق بھارت اور ویسٹ انڈیز کے درمیان چوتھا ٹیسٹ میچ ڈرا ہونے کے بعد بھارتی ٹیم ایک درجہ تنزلی کے بعد دوسرے نمبر پر آگئی ہے جس کے بعد دوسری پوزیشن پر موجود قومی کرکٹ ٹیم نے پہلی پوزیشن پر قبضہ جمالیا ہے۔
پاکستان کرکٹ ٹیم آسٹریلیا،انگلینڈ، بھارت اورجنوبی افریقہ کےبعد ٹیسٹ رینکنگ پربادشاہت کرنے والا پانچواں ملک بن گیا۔
اس سے قبل سری لنکا کے ہاتھوں تین ٹیسٹ میچوں کی سیریز میں کلین سوئپ کے بعد آسٹریلیا کی ٹیم پہلی پوزیشن سے محروم ہوگئی جس کے بعد اس کی جگہ بھارتی ٹیم سرفہرست آگئی ہے، آسٹریلیا کی بدترین ہار کا فائدہ پاکستان اور بھارت کو ملا اور انڈیا 112 پوائنٹس کے ساتھ پہلی جبکہ پاکستان 111 پوائنٹس کے ساتھ دوسری پوزیشن پر پہنچ گیا ہے۔