ایمز ٹی وی(اسپورٹس) پاکستان نے چار روزہ ٹیسٹ کی تجویز مسترد کر دی، چیئرمین پی سی بی شہریارخان کے مطابق جب بارش ہوئی تو ایسے میچز کا کیا ہو گا؟دبئی میں جاری آئی سی سی میٹنگ میں چار روزہ ٹیسٹ پر بھی بات ہونی ہے، شہریار خان نےمیڈیا سے بات چیت میں اس حوالے سے کہا کہ ٹیسٹ کرکٹ سے زیادہ چھیڑ چھاڑ مناسب نہیں، پانچ روزہ میچ ہی کھیل کا اصل حسن ہے، ایک دن کم کرنے سے کچھ فائدہ نہیں ہونے والا، ہم اس کی مخالفت کریں گے.
چار دن کا میچ کر دیا اور درمیان میں بارش کے سبب وقت ضائع ہوا تو کیسے نتیجہ برآمد ہو سکتا ہے؟۔دوسری جانب آئی سی سی ٹیسٹ کرکٹ کو دو درجات میں بھی تقسیم کرنے پر غور کر رہی ہے، بڑی ٹیمیں ایک اور دیگر دوسرے درجے میں ہوں گی۔ ان کے آپس میں میچز ہوا کریں گے، بنگلہ دیش اور سری لنکا نوشتہ دیوار پڑھتے ہوئے کھل کر اس کی مخالفت کر رہے ہیں، بھارت نے بھی ان کا ساتھ دیا جس کی وجہ سے گزشتہ عرصے اس تجویز کو منظوری نہیں مل سکی تھی، اب معاملہ پھر آئی سی سی میٹنگ میں زیرغور آئے گا۔
ادھر چیئرمین پی سی بی شہریارخان نے مجوزہ دو درجاتی نظام کے بارے میں کہا کہ ہمیں ایسوسی ایٹ ٹیموں کو بھی ٹاپ لیول پر صلاحیتوں کے اظہار کا موقع دینا ہوگا، جیسے آئرلینڈ اور افغانستان اپنے کھیل میں مزید بہتری لائیں تو انھیں ٹیسٹ اسٹیٹس مل سکتا ہے، اس حوالے میں آئی سی سی میٹنگ میں بات چیت کرکے ہی مزید تفصیلات کا علم ہوگا۔