ایمزٹی وی (تجارت) روسی خبر رساں ادارے کے مطابق روس آئندہ برس پاکستان میں تیل اور گیس کے منصوبوں پر کام شروع کردے گا۔ اس سلسلے میں ابتدائی معاہدے پر دستخط کیے جا چکے ہیں۔ پاکستان اور روس کے درمیان کئی منصوبوں پراہم پیش رفت ہوئی ہے۔ اور اس سلسلے میں لندن، ماسکو اور دیگر مقامات پر دونوں ممالک کے درمیان کئی اہم ملاقاتیں ہو چکیں ہیں۔ خبررساں ادارے itar-tass کے مطابق روسی ٹیکنالوجیز اسٹیٹ کارپوریشن کے نمائندے آندرے کو روبوو اور پاکستانی وزیر اعظم میاں محمد نواز شریف کے درمیان لندن میں ملاقات میں توانائی کے بحران کے خاتمے پر بات چیت کی گئی۔ اس موقع پر پاکستانی وزیر اعظم نے کہا کہ انکی حکومت نے توانائی کے بحران پر قابو پانے کے لئے توانائی کے منصوبوں کا آغاز کیا ہے۔ رپورٹ کے مطابق محکمہ اطلاعات نے منصوبوں کی تفصیلات شائع نہیں کیں۔ لیکن روسی کارپوریشن کے قریبی ذرائع نے خبررساں ادارے کو بتایا کہ روس اور پاکستان کی پہلے ہی ملاقاتیں ہو چکیں ہیں۔ دسمبر کے اوائل میں روس اور پاکستان کے بین الحکومتی کمیشن نے پاکستان میں تیل اور گیس کے شعبے میں بنیادی ڈھانچے کے منصوبوں پر عملدرآمد پر اتفاق کیا۔ روسی کارپوریشن نے تیل اور گیس کے شعبے میں کئی منصوبوں پر عمل درآمد کے لئے پاکستان کی سرکاری انٹرسٹیٹ گیس سسٹم کے ساتھ ابتدائی معاہدے پر دستخط کیے تھے۔ ذرائع کے مطابق آئندہ برس روسی کمپنی پاکستان میں تیل اور گیس کے بنیادی ڈھانچے کی تعمیری منصوبوں کوشروع کرے گی جو پاکستان کے اسٹریٹجک نکتہ نظر سے اہم ہیں ۔