ایمزٹی وی(انٹرنیشنل) انسانی حقوق کے عالمی ادارے ایمنسٹی انٹر نیشنل نے پاکستان کو غیر ملکی پناہ گزینوں کو پناہ دینے والا تیسرا بڑا ملک قرار دیا ہے ، دوسری طر ف رواں برس 2 لاکھ افغان مہاجرین اپنے وطن واپس لوٹ گئے ۔ تفصیلات کے مطابق ایمنسٹی انٹر نیشنل نے مہاجرین کے حوالے سے اعداد و شمار پر مبنی رپورٹ جاری کر دی ہے ، پاکستان میں اس وقت 16 لاکھ پناہ گزین رہ رہے ہیں ، جبکہ اردن میں 27 لاکھ اور ترکی میں 25 لاکھ پناہ گزین مقیم ہیں ۔ دنیا بھر کے 56 فیصد پناہ گزینوں کا بوجھ صرف دس ممالک اٹھا رہے ہیں ، جبکہ عالمی طاقتیں اس حوالے سے اپنی ذمہ داریاں ادا کرنے میں ناکام ہو رہی ہیں ، چند سال قبل تک پاکستان میں افغان پناہ گزینوں کی تعداد 30 لاکھ کے قریب تھی ، 2 لاکھ افغانی رواں برس وطن واپس گئے ہیں ، ان میں زیادہ تر گزشتہ ماہ اپنے وطن واپس لوٹے ۔ ایمنسٹی انٹرنیشنل کے سیکرٹری جنرل سلیل شیٹھی نے امیر ممالک سے مطالبہ کیا ہے کہ وہ زیادہ تعداد میں مہاجرین کو پناہ دیں ، انہوں نے کہا کہ برطانیہ اس ناکامی کی ایک مثال ہے ، برطانیہ نے 2011 سے صرف 8 ہزار شامی پناہ گزینوں کو پناہ دی ہے ، جبکہ اس کے برعکس اردن میں اس وقت تک 6 لاکھ سے زیادہ شامی پناہ گزین موجود ہیں ۔