ایمز ٹی وی( مانیٹرنگ ڈیسک) بین الاقوامی تنظیموں کے خلائی جہاز کسینی نے سیارہ زحل کے قریب چکر لگاتے ہوئے تازہ تصاویر بھیجی ہیں۔ خلائی جہاز کسینی نے اکانوے ہزار کلومیٹر کی دوری سے جو تازہ ترین تصاویر بھیجی ہیں ان میں سیارہ زحل کے رِنگ اور نصف کرہ جنوب میں طوفان دکھائی دیتا ہے۔
سائنسدانوں کا کہنا ہے یہ رِنگ ایک شہاب ثاقب کے زحل کے ایک چاند سے ٹکرانے کی وجہ سے پیدا ہونے والی گرد ہے اور سیارے کی سطح پر اٹھنے والے بھنور دائرے کی شکل کی بجائے چھ کونوں والے ہیں۔
ناسا، یورپ اور اٹلی کا مشترکہ خلائی جہاز کسینی بارہ برس تک زحل کے گرد چکر لگانے کے بعد ایندھن ختم ہونے کے باعث اگلے برس ستمبر میں اس کی سطح پر جا گرے گا۔
اگلے برس اپریل سے کسینی اپنا آخری سفر شروع کرے گا۔ اس کی سطح پر گرنے سے پہلے بائیس غوطے لگائے گا اور اس کی تباہی سے پہلے گزشتہ ماہ ناسا نے نئے مشن کا آغاز کیا تاکہ سیارہ زحل کے بارے میں جتنی معلومات ممکن ہو سکیں حاصل ہو جائیں۔