ایمزٹی وی(کراچی)ورماڑہ میں جناح نیول بیس پر دو بحری جہاز پی این ایس ہنگول اور بسول کو پاکستان میری ٹائم سیکیورٹی ایجنسی میں شامل کرنے کی پروقار تقریب ہوئی، وفاقی وزیر دفاع خواجہ آصف تقریب کے مہمان خصوصی تھے، اس موقع پر وزیر دفاع نے پاک بحریہ کی مختلف یونٹس کا دورہ بھی کیا۔
تقریب میں اعلیٰ سول و عسکری حکام نے شرکت کی، چین میں تیار ہونے والے یہ جہاز جدید آلات سے لیس ہیں جو خصوصی اقتصادی زون کی حفاظت اور میری ٹائم خطے میں قانون پر عمل داری میں مزید معاون ثابت ہوںگے۔ قبل ازیں وزیر دفاع جناب خواجہ محمد آصف نے پاک بحریہ کے آپریشنل امور اور ساحلی علاقوں کے عوام کی معاشی و سماجی حالت بہتر بنانے کے لیے پاک بحریہ کی جانب سے کئے جانے والے اقدامات کا جائزہ لیا۔ وزیر دفاع نے پاکستان نیوی کی آپریشنل تیاریوںاور خطے میں سیکیورٹی کو یقینی بنانے میں پاک بحریہ کے کردار پر اطمینان کا اظہار کیا۔
انہوں نے پاک چین اقتصاد ی راہداری کی بحری سیکیورٹی اورحفاظت کے سلسلے میں پاک بحریہ کے کردار کا خصوصیت سے ذکر کیا۔انہوں نے کہا کہ پاک چین اقتصادی راہداری اور گوادربندرگاہ منصوبے کی کامیابی کا انحصاربحرہندخصوصابحیرہ عرب میں محفوظ میری ٹائم ماحول پر منحصرہے جس کو یقینی بنانے کے لیے پاک بحریہ مکمل تیارہے۔