ایمز ٹی وی(اسپورٹس) پاکستان سپر لیگ (پی ایس ایل) کا فائنل میچ لاہور میں کرائے جانے کا حتمی فیصلہ کر لیا گیا ہے تاہم برطانوی میڈیا نے دعویٰ کیا ہے کہ فائنل میچ کیلئے غیر ملکی کمنٹیٹرز لاہور نہیں آئیں گے جبکہ نشریاتی حقوق بھی کسی اور براڈ کاسٹر کو دئیے جانے کا امکان ہے۔
تفصیلات کے مطابق 4 غیر ملکی کمنٹیٹرز این بشپ ، ڈینی موریسن ، ایلن ولکنز اور خاتون میل جونز پی ایس ایل میں کمنٹری کر رہی ہیں۔ برطانوی نشریاتی ادارے کے مطابق ای این بشپ ویسٹ انڈیز اور انگلینڈ کی سیریز کی کمنٹری کیلئے جزائر غرب الہند جا رہے ہیں جبکہ بقیہ تینوں غیر ملکی کمنٹیٹرز فائنل کیلئے لاہور نہیں آئیں گے۔
رپورٹ میں یہ بھی کہا گیا ہے کہ پاکستان سپر لیگ کے میچوں کو دکھانے والے براڈ کاسٹر کی تبدیلی کا بھی امکان ہے اور لاہور میں فائنل کے نشریاتی حقوق کسی دوسرے براڈ کاسٹر کو دیئے جاسکتے ہیں۔ پی ایس ایل کے براڈ کاسٹر نے غیر ملکی کمنٹیٹرز سے کہا ہے کہ ان کا معاہدہ پلے آف میچز تک ہے جس کے بعد ان سے نیا معاہدہ نیا براڈ کاسٹر کرسکتا ہے۔