ایمزٹی وی(اسلام آباد) وفاقی وزیر ریلوے خواجہ سعد رفیق نے کہا ہے کہ آصف زرداری دوسروں پر کمیشن لینے کا الزام لگانے سے پہلے آئینہ دیکھ لیا کریں، لوٹ مار کے نت نئے طریقے ایجاد کرنا آصف زرداری کا طرہ امتیاز ہے، سندھ کی ترقی و خوشحالی کیلئے 2018ء کے انتخابات میں پیپلز پارٹی کی شکست لازم ہے۔
خواجہ سعد رفیق نے کہا کہ قوم چوری کی چُوری کھا کر جوان ہونے والوں کو پاکستان لوٹنے کا موقع نہیں دے گی، زرداری پارٹی کے دس سالہ دور اقتدار نے سندھ کو آسیب زدہ کھنڈر بنا ڈالا ہے، سندھ کی ترجمانی کی دعویدار زرداری پارٹی نے سندھ کو مایوسی کے سوا کچھ نہیں دیا، مسلم لیگ (ن) اہل سندھ کو زرداریوں کی استحصالی حکومت سے نجات دلائے گی۔
انہوں نے کہا کہ انشاء اللہ سندھ میں سیاسی خلاء مسلم لیگ (ن) ہی پورا کرے گی، سندھ میں مسلم لیگی رہنماؤں کے خلاف انتقامی کارروائیوں سے ہماری پیشقدمی نہیں رک سکتی، سندھ کی ترقی و خوشحالی کیلئے 2018ء کے انتخابات میں پیپلز پارٹی کی شکست لازم ہے۔ وفاقی وزیر نے کہا کہ متبادل قیادت ملی تو اہل سندھ 2018ء کے انتخابات میں پیپلز پارٹی کا ’’ سندھ کارڈ ‘‘ان سے چھین لیں گے، پیپلز پارٹی کو پنجاب میں جلسوں کے انعقاد کے اعلان پر خوش آمدید کہتے ہیں، اہل پنجاب کے دل جیتنے کیلئے باتیں نہیں کارکردگی چاہیے۔ خواجہ سعد رفیق نے کہا کہ ہم سندھ میں دستک دے رہے ہیں، زرداری حکومت انتقامی کارروائیوں سے گریز کرے۔