ایمزٹی وی(اسپورٹس)اسپاٹ فکسنگ کی تحقیقات کرنے والے ٹربیونل نے شاہ زیب حسن کو 21اپریل کو طلب کرلیا ہے۔
میڈیا ذرائع کے مطابق پی سی بی اینٹی کرپشن یونٹ نے تحقیقات کے بعد شاہ زیب حسن پر 3شقوں کی خلاف ورزی پر مبنی چارج شیٹ جاری کرکے شاہ زیب کو معطل کردیا تھا، شاہ زیب نے الزامات مسترد کرتے ہوئے ٹربیونل جانے کا فیصلہ کیا۔
ذرائع کے مطابق جسٹس ریٹائرڈ اصغر حیدر کی سربراہی میں قائم کردہ تین رکنی ٹربیونل نے معطل کرکٹر کو آئندہ جمعے کو طلب کرلیا ہے۔
جمعے کو شاہ زیب اور وکلاءکی موجودگی میں ابتدائی سماعت ہوگی جس میں کیس سے متعلق ٹرمز آف ریفرنسز بنائے جائیں گے، اگلے مرحلے میں پی سی بی کو ثبوت پیش کرنے ہوں گے جس کا جواب شاہ زیب ٹربیونل کے سامنے دیں گے۔
