ایمز ٹی وی(کراچی) سندھ میں رینجرز کے خصوصی اختیارات کا نوٹیفکیشن جاری نہ ہوسکا۔ تاہم سندھ حکومت نے گورنر ہاؤس اور وزیر اعلیٰ ہاؤس سمیت اہم تنصیبات کی سیکورٹی سے متعلق نوٹیفکیشن جاری کر دیا ۔ رینجرز کے مطابق نوٹیفکیشن تاثر دیتا ہے کہ رینجرز پولیس کی طرح کام کرے گی تاہم آرٹیکل 147رینجرز کو قطعا ًپولیسنگ کے اختیارات نہیں دیتا ۔ سندھ حکومت کی جانب سے جاری نوٹیفکیشن میں کہا گیا ہے کہ آئین کے آرٹیکل 147 کے تحت رینجرز کو حاصل اختیارات کے تحت رینجرز وزیراعلیٰ ہاؤس، گورنر ہاؤس کی سیکورٹی کی پابند ہے۔ عدالتوں، اسمبلی، آئل ریفائنری، اہم تنصیبات، ایئرپورٹ کی سیکورٹی بھی رینجرز کے ذمے ہے۔ نوٹیفکیشن میں مزید کہا گیا ہے کہ یونیورسٹیز دیگر تعلیمی اداروں، سی پیک منصوبوں کی سیکورٹی بھی رینجرز کی ذمہ داری ہے، رینجرز کو یہ اختیارات گزشتہ برس یکم اگست کو دیے گئے تھے۔ سندھ حکومت کے نوٹیفکیشن پر رینجرز حکام کا کہنا ہے آرٹیکل 147 رینجرز کو قطعا پولیسنگ کے اختیار ات نہیں دیتا، آرٹیکل 147 کا مطلب رینجرز کو پولیس کی طرح استعمال کرنا نہیں ہے جبکہ جاری کردہ نوٹیفکیشن تاثر دیتا ہے کہ رینجرز پولیس کی طرح کام کرے گی ۔