ایمز ٹی وی (مانیٹرنگ ڈیسک) 22اپریل 2017آج پاکستان سمیت دنیا بھر میں اقوام متحدہ کے زیر اہتمام انٹرنیشنل ارتھ ڈے منایا جارہا ہے۔
اس دن کو عالمی سطح پر منانے کا بنیادی مقصد کرہ ارض کی حفاظت سے اور ماحولیاتی آلودگی سے وابستہ مسائل کی جانب عالمی برادری کی توجہ دلانا ہے۔
یہ دن پہلی مرتبہ 1970ء میں دنیا میں منایا گیا تھا۔ تب سے اب تک ’ارتھ ڈے‘ دنیا کے کئی ممالک میں باقاعدگی سے منایا جاتا ہے۔دنیا بھر میں اس موقعے پر اپنے ماحول کی صفائی اور فضائی آلودگی پھیلانے سے گریز کے لیے آگہی کے پروگرام منعقد کیے جاتے ہیں۔
اس دن مقامی کمیونٹیز بھی اپنے اپنے علاقوں میں صفائی کرکے اس دن کی اہمیت اجاگر کرتی ہیں۔ بہت سی تنظیمیں شہر میں ساحلِ سمندر، دریاؤں یا دیگر قدرتی مقامات پر جا کر صفائی کا کام کرکے زمین کو صاف ستھرا رکھنے کی کوششوں میں اپنا حصہ کا کام کرتی ہیں۔
عالمی شہرت یافتہ سرچ انجن گوگل نے بھی اپنا نیا ڈوڈل جاری کیا ہے جس میں ڈوڈل نے بڑھتی ہوئی آلودگی کو مدنظر رکھتے ہوئے کرہ ارض پر صفائی اور اس کی حفاظت کا واضح پیغام دیا ہے۔
عالمی ادارہ صحت کے مطابق 12.6 ملین افراد ہر سال آلودہ ماحول کی وجہ سے جان کی بازی ہار جاتے ہیں۔