ایمزٹی وی (مانیٹرنگ ڈیسک)حال ہی میں پیناسونک کمپنی نے ایک چھوٹا چلنے پھرنے والا فریج متعارف کرایا ہےجو ایپ یا آواز کے حکم پر آگے بڑھ کر آپ کو پسندیدہ مشروبات اور کھانے کی اشیا پہنچاسکتا ہے۔
پینا سونک کے اسمارٹ ریفریجریٹر کا عملی مظاہرہ حال میں جرمنی میں ایک ٹیکنالوجی نمائش میں کیا گیا ہے۔ یہ فریج آرام سے باورچی خانے کے ایک کونے میں سمائے رہتا ہے اور آپ اسے جب بلاتے ہیں تو یہ دھیرے دھیرے آگے بڑھتا ہے آپ کے پاس پہنچ جاتا ہے۔
اس میں نصب اسمارٹ کیمرہ 15 سینٹی میٹر آگے تک دیکھ سکتا ہے اور از خود کمرے کا نقشہ بناکر رکاوٹوں کو نظر انداز کرتے ہوئے آگے بڑھتا رہتا ہے۔ اس کے علاوہ ایک مخصوص ایپ سے بھی یہ مکمل طور پر کنٹرول ہوسکتا ہے۔ پورے گھر کو سمجھنے کے بعد یہ ازخود مڑتا ہے اور اپنے مقام تک پہنچ جاتا ہے۔ اس میں نصب بیٹری اس کے تمام کاموں کو کنٹرول کرتی ہے اور جب بیٹری ختم ہونے لگتی ہے تو فریج ازخود اپنے جارچنگ اسٹیشن سے جاکر منسلک ہوجاتا ہے۔ اس کی دوسری اہم بات یہ ہے کہ اس کے اندر موجود اشیا کی تفصیل سے یہ اچھی طرح واقف رہتا ہے۔