لاہور: مسلم لیگ (ن) کی مرکزی رہنما مریم نواز نے کہا ہے کہ عوام کے مسائل کو ان کی دہلیز پر حل کرنا حکومت کی اوّلین ترجیحات میں شامل ہے اور اس کی راہ میں آنے والی رکاوٹوں کو دور کیا جارہا ہے ،آئندہ عام انتخابات میں کارکردگی کا مقابلہ ہوگا اور انشا اللہ عوام کی عدالت میں سر خرو ہوں گے۔ ان خیالات کا اظہار انہوں نے جاتی امراءرائے ونڈ میں یونین کونسل 68کے چیئرمین شہباز حیدر کی قیاد ت میں ملاقات کےلئے آنے والے بلدیاتی نمائندوں اور متحرک رہنماﺅں کے وفد سے گفتگو میں کیا۔ وفد نے مریم نواز کو مسائل سے آگاہ کیا جنہیں حل کرنے کی یقین دہانی کرائی گئی ۔ مریم نواز نے مزید کہا کہ تاریخ گواہ ہے کہ مسلم لیگ (ن) کے دور حکومت میں ملک میں ریکارڈ ترقیاتی کام ہوئے اور ہر شعبہ ترقی کی جانب گامزن ہوا ۔ موجودہ دور میں حکومت کی راہ میں جتنی رکاوٹیں ڈالی گئی اس کی مثال نہیں ملتی لیکن اس کے باوجود حکومت نے عوام کی خدمت اور ملک کو آگے لے جانے میں کوئی کسرا ٹھا نہیں رکھی۔ بلدیاتی ادارے جمہوریت کی بنیاد ہیں اور حکومت ان کی مضبوطی کےلئے ہر ممکنہ اقدام کر رہی ہے۔