کراچی: ڈاکٹرمحمد اجمل خان انسٹی ٹیوٹ آف سسٹین ایبل ہیلو فائٹ یوٹیلائزیشن جامعہ کراچی کے زیراہتمام سابق وائس چانسلر پروفیسر ڈاکٹر محمد اجمل خان کی یاد میں پہلی لیکچر سیریز بعنوان: ”ڈاکٹرمحمد اجمل خان لیکچر“ گذشتہ روز کلیہ علوم کے کونسل روم میں منعقد ہوا۔حفرالبطین یونیورسٹی سعودیہ عرب سے آئے ہوئے سائنسدان پروفیسر احمد ضیاءنے لیکچر بعنوان: ”ریگستانی ماحول کے نباتات میں ضیائی تالیف کے عمل“ پر روشنی ڈالتے ہوئے کہا کہ اس طرح کے ماحول میں پائے جانے والے نباتات پر تحقیق روایتی فصلوں کی پیدوار کو مزید بہتر بنانے میں کلیدی کردار اداکرسکتی ہے۔قدرتی طور پر صحرائی ماحول کو برداشت کرنے کی صلاحیت کی جانچ زرعی میدان میں ترقی میں سنگ میل ثابت ہوسکتی ہے جو موجودہ ماحولیاتی تبدیلیوں سے نبردآزماہونے کے لئے ناگزیر ہے۔
اس موقع ڈاکٹرمحمد اجمل خان انسٹی ٹیوٹ آف سسٹین ایبل ہیلو فائٹ یوٹیلائزیشن جامعہ کراچی کی ڈائریکٹر پروفیسر ڈاکٹر بلقیس گل نے کہا کہ مذکورہ لیکچر سیریز شروع کرنے کا مقصد غیر روایتی طریقہ کاشت اور صحرائی وسیم زدہ زمینوں کے بارے میں آگاہی فراہم کرنے کے ساتھ ساتھ سابق وائس چانسلر پروفیسر ڈاکٹر محمد اجمل خان کے تحقیقی کارناموں کو مزید فروغ دینا ہے۔
لیکچر میں جامعہ کراچی کے مختلف شعبہ جات بالخصوص نباتیات،حیاتی کیمیائ،انسٹی ٹیوٹ آف انوائرمینٹل اسٹڈیز اور خردحیاتیات کے اساتذہ وطلبہ کی کثیر تعداد نے شرکت کی۔