ایمز ٹی وی (ایجوکیشن) ہیپا ٹائٹس کا مرض بہت تیزی کے ساتھ پھیل رہا ہے جس کی روک تھام کےلئے محکمہ صحت سمیت تمام متعلقہ محکموں کو مربوط کوششیں کرنا ہوں گی۔ ہیپا ٹائٹس سے بچاؤاور عوامی شعور اجاگر کرنے کے لئے بھر پورتشہیری مہم چلانے کے ساتھ تعلیمی نصاب میں مضمون بھی شامل کرایا جائےگا۔
یہ بات مشیر صحت پنجاب خواجہ سلمان رفیق نے اجلاس کی صدارت کرتے ہوئے کہی- اجلاس میں پروفیسر غیاث النبی طیب اور دیگرنمائندوں نے شرکت کی - پروفیسرغیاث النبی طیب نے ملک میں ہیپاٹائٹس کی صورتحال اور پنجاب میں اس بیماری کی روک تھام اور مریضوں کے علاج کے بارے بریفنگ دی۔ انہوں نے بتایا اس وقت پنجاب میں ہیپا ٹائٹس بی اور سی کے 70 لاکھ کیسز موجود ہیں۔انہوں نے کہا ڈینگی کی طرح ہیپا ٹائٹس کے بارے ایک مضمون سکولوں کے تعلیمی نصاب میں شامل کرایا جائے گا۔