اسلام آباد: مولانا فضل الرحمان نے حکومت کے خلاف مشاورت کے لیے آل پارٹیز کانفرنس بلانے کا فیصلہ کیا ہے جس کے لیے انہوں ںے احسن اقبال اور بلاول سے رابطہ کیا ہے۔
جمعیت علمائے اسلام (ف) کی جانب سے جاری کردہ اعلامیے میں بتایا گیا ہے کہ مولانا فضل الرحمان نے اپوزیشن رہنماؤں بلاول بھٹو زرداری اور احسن اقبال کو ٹیلی فون کرکے 26 نومبر کو آل پارٹیز کانفرنس بلانے کا فیصلہ کیا ہے۔ آل پارٹیز کانفرنس میں حکومت مخالف تحریک سے متعلق مشاورت ہوگی۔
اعلامیے کے مطابق مولانا فضل الرحمان نے چیئرمین پیپلز پارٹی بلاول بھٹو زرداری کو فون کیا، دونوں رہنماؤں نے ملکی سیاسی صورتحال پر تبادلہ خیال کیا جب کہ اے پی سی اور رہبر کمیٹی کو مزید فعال کرنے پر بھی اتفاق کیا اب دونوں کے درمیان جلد ملاقات کا امکان ہے۔
اسی طرح سربراہ جے یو آئی نے مسلم لیگ (ن) کے جنرل سیکریٹری احسن اقبال کو بھی ٹیلی فون کیا اور آل پارٹیز کانفرنس میں شرکت کی دعوت دی۔