ہم چہرے پر مہنگی مہنگی پروڈکٹس یا ٹوٹکوں کا استعمال کر کے جِلد کو خوبصورت بنانے کے لیے ہمیشہ کوشاں رہتے ہیں لیکن آج ہم آپ کو چمکدار جِلد بنانے کے لیے کسی بھی قسم کے ٹوٹکے یا پروڈکٹس کے بارے میں نہیں بتانے والے۔
اب آپ بھی یہی سوچ رہے ہوں گے کہ ٹوٹکوں یا اسکن پروڈکٹس کا استعمال کیے بغیر جِلد کیسے چمکدار ہوگی تو ہم آپ کو یہی بتانے والے ہیں۔
جیسا کہ ہم سب کو ہی یہ بات معلوم ہے کہ ورزش انسان کے دل، پھیپھڑے اور دماغی صحت کے لیے بے حد ضروری ہے لیکن ورزش کا تعلق انسان کی جِلد سے بھی ہوتا ہے۔
ورزش انسان کا مزاج بہتر کرکے دباؤ کی کیفیت کو کم کرنے کے ساتھ ساتھ آکسیڈیٹو اسٹریس کو بھی کم کرنے میں مددگار ثابت ہوتی ہے۔
پولینڈ کی یونیورسٹی آف سیزیسن کی جانب سے کی گئی تحقیق کے مطابق روزانہ ورزش کرنے سے انسانی جسم میں قدرتی طور پر اینٹی آکسیڈینٹس پیدا ہوتے ہیں جو کہ جسم کے خلیوں یعنی (سیلز) کے محافظ ہوتے ہیں یہی وجہ ہے کہ اس سے جِلد چمکدار ہوجاتی ہے۔
علاوہ ازیں یونیورسٹی آف ویلنسیا کی جانب سے بھی ایک تحقیق کی گئی ہے جس کے مطابق روزانہ ورزش کرنے سے جسم میں اینٹی آکسیڈینٹس بنتے ہیں جس کی وجہ سے جِلد چمکدار ہوجاتی ہے۔
اگر آپ بھی جوان دکھنا اور چمکدار جِلد کے خواہاں ہیں تو روزانہ ورزش کرنے کو معمول بنا لیجیے۔