سندھ حکومت نے کورونا وائرس کے خطرے کے پیش نظر صوبے بھر کے تعلیمی ادارے 13 مارچ تک بند رکھنے کا اعلان کردیا ہے۔

وزیراعلی سندھ سید مراد علی شاہ نے کورونا وائرس سے متعلق ٹاسک فورس کے چوتھے اجلاس کی صدارت کی ۔

اجلاس میں 13 مارچ تک سندھ بھر کے تمام سرکاری و نجی تعلیمی ادارے بند رکھنے کا فیصلہ کیاگیا تاکہ مشتبہ افراد کی آئسولیشن کی مدت پوری کی جاسکے۔ اس کے ساتھ  ہی وزیراعلیٰ سندھ سید مراد علی شاہ نے ہدایت جاری کرتے ہوئے کہا ہے کہ حفاظتی انتظامات کے پیش نظر تمام کوچنگ سینٹرز اور ٹیوشن سینٹرز بھی 13 مارچ تک بند رکھے جائیںگے۔

تعطیلات کا فیصلہ اساتذہ اور غیر تدریسی عملے پر بھی لاگو ہوگا جبکہ ایسے تعلیمی ادارے جہاں شام کے اوقات میں کوچنگ سینیٹرز موجود ہیں وہاں بھی 13 مارچ تک تعطیلات ہوں گی۔

 واضح رہے کہ گزشتہ روزپاکستان کے وزیرِ مملکت برائے صحت ظفر مرزا نے ملک میں کورونا وائرس کا مزید ایک کیس سامنے آنے کی تصدیق کی ہے۔ جس کے بعد ملک میں متاثرہ افراد کی تعداد 5 ہوگئی ہے۔