پاکستان بیت المال (پی بی ایم) اور انسٹیٹیوٹ آف بزنس ایڈمنسٹریشن کراچی کے مابین یکم ستمبر 2020ء کو مفاہمت کی ایک یادداشت (ایم او یو) پر دستخط ہوئے جس کے تحت پاکستان بیت المال آئی بی اے کراچی کے 25 مستحق طلباء کو وظائف فراہم کرے گا۔ ہر طالب علم ہر سال ایک لاکھ روپے تک کی مالی معاونت حاصل کرے گا۔

 

پاکستان بیت المال کے منیجنگ ڈائریکٹر عون عباس بپی اور آئی بی اے کراچی کی ڈائریکٹر کارپوریٹ ریلیشن محترمہ ملاحت اعوان نے مفاہمت کی یادداشت پر دستخط کئے۔ مفاہمت کی یادداشت کے مطابق پاکستان بھر میں اس کے مختلف دفاتر میں ان طلباء کو انٹرن شپ مواقع پیش کرے گی جس پر ابتدائی طور پر دو سال کے لئے دستخط کئے گئے ہیں۔

 

اس موقع پر گفتگو کرتے ہوئے عون عباس بپی نے کہا کہ پاکستان بیت المال کو آئی بی اے کی مدد پر انتہائی خوشی ہے کیونکہ یہ پاکستان کی انتہائی معروف جامعات میں سے ایک ہے۔ وقت کے ساتھ ساتھ ہمارے آئی بی اے کے ساتھ تعلقات مستحکم ہوں گے، توقع ہے کہ ہم 25 مزید طلباء کو شامل کرکے پاکستان بیت المال کی جانب سے تعاون میں اضافہ کریں گے۔

 

محترمہ اعوان نے خاص طور پر اس مشکل وقت کے دوران جب COVID کے باعث بہت سے خاندان متاثر ہیں، پاکستان بیت المال کی

آئی بی اے کے لئے امداد پر شکریہ ادا کیا۔

 

انہوں نے عون عباس بپی کو دعوت دی کہ وہ آئی بی اے کا دورہ کریں اور پاکستان بیت المال کی طرف سے امداد حاصل کرنے والے طلباء سے ملاقات کریں گے۔

 

ملک میں وباء کے معاشی اثرات کے پیش نظر آئی بی اے کراچی نے اپنے مالی امداد کے پروگرام کو 380 ملین روپے تک بڑھایا جو گزشتہ سال کے مقابلہ میں 25 فیصد زائد ہے جس سے 1200 سے زائد ضرورت مند طلباء مستفید ہوں گے۔