کراچی : پاکستان میڈیکل اینڈ ڈینٹل کونسل نے ملک کے 10 میڈیکل کالجز کو غیر قانونی قرار دے کر ان کی رجسٹریشن منسوخ کردی۔
پاکستان میڈیکل اینڈ ڈینٹل کونسل کی جانب سے جاری ہونے والے پبلک نوٹس کے مطابق پاکستان میڈیکل کمیشن (پی ایم سی) کے دور میں رجسٹرڈ کیے گئے 10 میڈیکل کالجز کی رجسٹریشن منسوخ کرکے آئندہ سال کے لیے داخلہ دینے سے بھی روک دیا گیا ہے۔
نوٹس کے مطابق پی ایم ڈی سی جب تک ان میڈیکل کالجز کی انسپیکشن نہیں کرے گی ان کالجوں کی کوئی قانونی حیثیت نہیں، ان تمام کالجوں کو پاکستان میڈیکل کمیشن نے رجسٹریشن دی تھی جسے اسلام ہائی کورٹ نے کالعدم قرار دیا ہے۔
سندھ میں غیرقانونی اوررجسٹریشن منسوخی والے میڈیکل کالجز میں کراچی کے ڈاؤ ڈینٹل کالج، فضائیہ رتھ فاؤ میڈیکل کالج، محمد میڈیکل کالج میرپور خاص اور خیرپور میڈیکل کالج شامل ہیں۔ اس کے علاوہ ایبٹ آباد انٹرنیشنل میڈیکل کالج، سوات میڈیکل کالج کے پی کے، شفا کالج آف ڈینٹسٹری تعمیر ملت اسلام آباد، عزا نائید ڈینٹل کالج لاہور، واتم میڈیکل کالج راولپنڈی اور راول انسٹیٹوٹ آف ہیلتھ سائسنز ڈینٹل سیکشن بھی شامل ہیں
پی ایم ڈی سی کے حکام کے مطابق رجسٹریشن منسوخ ہونے والے میڈیکل کالجوں کی انسپیکشن کا آغاز جلدکردیا جائے گا اور اسلام آباد ہائی کورٹ کے مذکورہ حکم کے تحت زیرِ تعلیم طلبہ و طالبات اپنی تعلیم ان ہی میڈیکل کالجوں میں جاری رکھیں گے، انسپیکشن کے بعد متعلقہ کالج نئے داخلے دینے کے مجاز ہوں گے۔
نوٹس میں کہا گیا ہے کہ سال 20-2019 میں داخلہ لینے والے طلبہ و طالبات پی ایم ڈی سی کے رجسٹرڈ کالجز میں اپنے آپ کو ایڈجسٹ کریں۔