کراچی: بین الاقوامی مرکز برائے کیمیائی و حیاتیاتی علوم(آئی سی سی بی ایس) جامعہ کراچی کے سربراہ اور کامسٹیک کے کوارڈینیٹر جنرل پروفیسر محمد اقبال چوہدری نے کہا ہے کہ ہمارا مشن دنیا میں اوآئی سی رکن ممالک اور پاکستان کی مصنوعات کو فروغ دینا ہے، نئے خیالات اور جدت طرازی کو پیش کرنے کے لئے نمائش بہترین وسیلہ ہوتی ہے۔
آئی سی سی بی ایس جامعہ کراچی میں ”صحت کی نگہداشت میں ٹیکنالوجی کی فعالیت“ کے موضوع پر منعقدہ دو روزہ کامسٹیک آئی سی سی بی ایس بین الاقوامی نمائش (8تا9 ستمبر) جمعرات کو حکومت، سائینسدانوں، مخٰیّرافراد اور صنعتی رہنماؤن کی جانب سے مسلم دنیا میں ٹیکنالوجی پر مبنی ترقی کے اعادے کے ساتھ اختتام پذیر ہوئی۔
اس بین الاقوامی نمائش میں 21 سے زیادہ نمائش کنندہ نے شرکت کی جس کے توسط سے ملک میں جدت طرازی اور صنعقی ترقی کی ثقافت کو فروغ دینے کے حوالے سے مقامی سطح پر تیارٹیکنالوجی کی اہمیت پر روشنی ڈالی گئی۔ بین الاقوامی نمائش کا انعقاد آئی سی سی بی ایس ٹیکنالوجی پارک اینڈٹیکنالوجی ایکیوبیشن سینٹر جامعہ کراچی اور او آئی سی کامسٹیک کے باہمی تعاون سے ہوا۔
اختتامی تقریب سے خطاب کرتے ہوئے پروفیسر اقبال چوہدری نے کہا کہ بائیو میڈیکل اینجئنئرنگ اور صحت کی نگہداشت شعبہ جات میں ٹیکنالوجی اور جدت طرازی کو فروغ دینا اس بین الاقوامی نمائش کا ہدف تھا، اس نمائش میں پاکستان اور او آئی سی رکن ممالک سے مستقبل کی ٹیکانوجی، سلوشن اور حکمتِ عملی کو پیش کرنا تھا۔
انہوں نے کہا کہ انوویٹر ز، ٹیکنالوجی ڈیولپرز اور سروس پرووائڈرز کے لئے یہ کامسٹیک آئی سی سی بی ایس بین الاقوامی نمائش ایک منفرد پلیٹ فارم ثابت ہوئی ہے جہاں متعلقہ افراد نے سائینس اور جدت طرازی کے عنوان سے اپنی پیشہ ورانہ صلاحیتوں کا مظاہرہ کیا۔ انہوں نے کہا آئی سی سی بی ایس ٹیکنالوجی پارک اور ٹیکنالوجی انکیوبیشن سینٹر جامعہ کراچی تعلیمی اداروں میں اپنی نوعیت کا سب سے بڑا ادارہ ہے۔ آخر میں پروفیسر اقبال چوہدری نے نمائش کے شرکاء کو اسناد پیش کی۔