ایمز ٹی وی (کراچی) سندھ کے وزیر اطلاعات و بلدیات شرجیل انعام میمن نے کہا ہے کہ سندھ حکومت نےسمندری طوفان نیلوفرکے پیش نظر تمام پیشگی انتظامات کرلئے ہیں۔ متعلقہ اداروں کے عملے کی چھٹیاں بھی منسوخ کردی گئی ہیں، جبکہ کراچی سمیت تمام سندھ کے ساحلی علاقوں میں ہائی الرٹ کردیا گیا ہے۔ شرجیل انعام میمن نے کہا کہ سمندری طوفان نیلوفرکے حوالے سے وزیر اعلیٰ سندھ نے تمام متعلقہ اداروں کے افسران کا اجلاس بھی منعقد کیا ہے۔ تمام اداروں کو ہائی الرٹ کردیا گیا ہے۔ انہوں نے کہا کہ کراچی، ٹھٹھہ، بدین سے ننگر پارکر تک انتظامیہ کو الرٹ کردیا گیا ہے۔ ۔شرجیل انعام میمن نے ایوان کو بتایا کہ حکومت سندھ محکمہ موسمیات کے ساتھ مکمل رابطے میں ہے۔ انہوں نے کہا کہ سمندر میں جانے والے تمام ماہی گیروں کو بھی طوفان کے حوالے سے آگاہ کردیا گیا ہے اور میری ٹائم سیکورٹی ایجنسی کی معرفت سمندر میں موجود ماہی گیروں کو وائرلیس اور ریڈیو میسیج کے ذریعے واپس کناروں پر آنے کے اعلانات بھی کئے جارہے ہیں۔ انہوں نے کہا کہ کراچی میں کمشنر اور ایڈمنسٹریٹر کے ایم سی بھی تمام متعلقہ اداروں سے رابطے میں ہیں۔