ایمزٹی وی(اسپورٹس) فٹبال کی عالمی تنظیم فیفا کی ایتھکس کمیٹی نے تنظیم کے صدر سیپ بلاٹر کو نوے روز کیلئے معطل کردیا. تفصیلات کے مطابق فیفا کی ایتھکس کمیٹی نے تنظیم کے صدر سیپ بلاٹر سمیت سیکرٹری جنرل جیروم والک اور نائب صدر مائیکل پلاٹینی کو بھی نوے روز کے لئے معطل کردیا ہے۔ ذرائع کے مطابق تینوں آفیشلز انکوائری مکمل ہونے تک فٹبال کی کسی بھی طرح کی سرگرمیوں میں حصہ نہیں لے سکتے جبکہ ڈسپلن کی خلاف ورزی پر فیفا کے سابق نائب صدر چنگ مونگ جون کو چھ سال کیلئے معطل اور جرمانہ عائد کردیا ہے۔واضح رہےسیپ بلاٹر پر یوئیفا کے صدر کو غیر قانونی طور پر فنڈز مہیا کرنے اور دیگر الزامات ہیں، بلیٹر کی معطلی کی سفارش ان کے خلاف سوئس اہلکاروں کی جانب سے گذشتہ ماہ سے جاری فوجداری تحقیقات کے آغاز کے تناظر میں کی گئی تھی۔جبکہ دوسری جانب سیپ بلاٹر نے تمام الزامات کو مسترد کرتے ہوئے کہا ہے کہ وہ کرپشن میں ملوث نہیں اور ان پر لگنے والےالزامات بے بنیاد ہیں.