ایمزٹی وی(کراچی) سندھ ہائیکورٹ نے سندھ میں ہونے والے بلدیاتی انتخابات کے دوران نجی اسکولوں کو پولنگ اسٹیشن بنانے کے لیے الیکشن کمیشن آف پاکستان (ای سی پی) کے جاری کردہ نوٹیفیکیشن کو معطل کردیا ہے۔تفصیلات کے مطابق جسٹس محمد علی مظہر کی سربراہی میں ڈویژنل بینچ نے ایک درخواست کی سماعت کی جو بہادرآباد میں داؤد پبلک اسکول کو پولنگ اسٹیشن بنانے کے خلاف دائر کی گئی تھی۔بینج نے ای سی پی کے نوٹس کو معطل کرتے ہوئے حکم دیا کہ قانون کے مطابق کسی بھی نجی جائیداد کو پولنگ اسٹیشن بنانے کے لیے استعمال نہیں کیا جاسکتا۔خیال رہے کہ ای سی پی نے یونین کونسلز 17،18 اور 19 کے لیے نجی اسکول کی عمارت کو پولنگ اسٹیشن بنانے کا نوٹس جاری کیا تھا۔