ایمز ٹی وی(انٹرٹینمنٹ)پروڈیوسر سدھارتھ رائے کپور سے شادی کرنے والی 38 سالہ اداکارہ ودیا بالن کا ماننا ہے کہ شادی اور عمر سے کوئی فرق نہیں پڑتا۔یہ بات انھوں نے ایک انٹرویو کے دوران کہی ۔

ودیا بالن کا کہنا تھا کہ ہم سب کے ارد گرد تبدیلی آتی ہے، خواتین کی زندگی 30 سال کے بعد ختم نہیں ہوتی، نہ ہی شادی اور بچے اس کی وجہ بنتے ہیں۔ پہلے سمجھا جاتا تھا کہ ایک اداکارہ کی بالی ووڈ میں زندگی کم دورانیے کی ہوتی ہے مگر اب ایسا کچھ نہیں۔ودیانے دوسری اداکاراؤں کا حوالہ دیتے ہوئے کہنا تھا کہ عمر اب صرف نمبر بن کر رہ گئی ہے۔ کاجول آج بھی اسی طرح اداکاری کر رہی ہیں، ان کے بچے بھی ہیں۔ ایشوریا ایک بیٹی کی ماں ہیں اور کچھ سالوں کا وقفہ لینے کے بعد وہ پھر سے اداکاری کر رہی ہیں۔ اسی طرح بالی ووڈ میں کئی اداکارائیں ہیں جو شادی شدہ بھی ہیں اور اپنے کیرئیر کو بھی آگے بڑھا رہی ہیں، اور زیادہ تر اداکاراؤں کی عمر 30 سال سے زائد ہے۔

ودیا بالن نے مزید کہا کہ وہ خود کو خوش قسمت سمجھتی ہیں کہ انھیں ایسی فلموں میں کام کرنے کا موقع ملا اور وقت گزرنے کے ساتھ انھیں مزید فلموں میں کام کرنے کی پیشکش ہورہی ہے۔ واضح رہے کہ اداکارہ ان دنوں امیتابھ بچن کے ساتھ فلم میں کام کر رہی ہیں۔