ایمزٹی وی(بزنس) وزارت خزانہ نے پاکستان اسٹیل مل انتظامیہ سے تنخواہوں کے معاملے پر پوچھ گچھ شروع کر دی ہے۔ چارماہ سے زائد عرصے سے تنخواہیں نہ ملنے پر ملازمین کے احتجاج کے بعد اقتصادی رابطہ کمیٹی نے 29 جنوری کودوماہ کی تنخواہوں کی ادائیگی کی منظوری دی تھی تاہم وزارت خزانہ کے ذرائع کے مطابق پاکستان اسٹیل مل انتظامیہ سے تنخواہوں کے معاملے پر پوچھ گچھ شروع کر دی گئی ہے جس میں انتظامیہ سے پوچھا گیاہے اسٹیل مل کی پیداوار گزشتہ 8 ماہ سے بند ہے تو کنسلٹنٹ کیوں رکھے ہیں۔ مالی حالت خراب ہونے کے باوجود اسلام آباد‘ لاہور اور کراچی کے ریجن دفاتر میں افراد کی تعداد کیسے بڑھی۔ 3سال کے دوران اسٹیل مل کے کتنے ملازمین ریٹائر ہوئے۔ ملازمین میں کمی ہوئی لیکن تنخواہوں کا بجٹ 48 کروڑکیوں ہے۔ ذرائع کا کہنا ہے کہ جب تک ان تمام سوالات کے جوابات نہیں دیے جائیں گے تنخواہوں کے لیے رقم جاری نہیں کی جائے گی۔