ایمز ٹی وی (لاہور) وزیراعلی پنجاب شہباز شریف کا کہنا ہے کہ فلاح عامہ کے منصوبوں کواعلیٰ معیار کے ساتھ مکمل کیا جا رہا ہے جب کہ پنجاب حکومت دیہی اور شہری علاقوں کیلئے ترقی کی متوازن پالیسی پرعمل پیرا ہے۔
وزیراعلیٰ پنجاب کی زیرصدارت اعلی سطح کا اجلاس ہوا جس میں اراکین اسمبلی، پارلیمانی سیکرٹری صحت خواجہ عمران نذیر، متعلقہ سیکرٹریز ، کمشنر لاہور ڈویژن سمیت اعلی حکام نےشرکت کی جب کہ اجلاس کے دوران صوبے میں فلاح عامہ کے منصوبوں پر پیشرفت کا جائزہ لیا گیا۔
اجلاس کے دوران وزیراعلیٰ شہباز شریف کا کہنا تھا کہ پنجاب میں عوام کی فلاح و بہبود کے لئے متعدد منصوبوں پر تیزی سے کام ہورہا ہے ، عوام کی بے لوث خدمت ہمارا مشن ہے، مسلم لیگ (ن) کی حکومت نے شفافیت، اعلی معیاراورتیزرفتاری سے منصوبوں کی تکمیل کے کلچر کو پروان چڑھایا ہے جہاں حکومت کی شفاف پالیسی کا اعتراف نہ صرف ملکی بلکہ بین الاقوامی ادارے بھی کر رہے ہیں۔ ان کا کہنا تھا کہ آئندہ ڈھائی برس میں تعلیم، صحت ، پینے کے صاف پانی کی فراہمی سمیت عوام کو بہترین سہولیات مہیا کرنے کے لئے وسائل میں کمی نہیں آنے دیں گے۔
شہبازشریف کا کہنا تھا کہ پنجاب حکومت دیہی اورشہری علاقوں کے لئے ترقی کی متوازن پالیسی پرعمل پیرا ہے، دیہی سڑکوں کی تعمیروبحالی کے بڑے منصوبے پرتیزرفتاری سے کام ہورہا ہے جس سے معیشت کوبے پناہ فائدہ پہنچے گا، تعلیم و صحت کی سہولتوں کی بہتری اور پینے کے صاف پانی کی فراہمی کے لئے اربوں روپے کے منصوبوں پر کام ہورہا ہے جب کہ فلاح عامہ کے منصوبوں کو اعلیٰ معیار کے ساتھ مکمل کیا جا رہا ہے،وزیر اعظم نواز شریف کی قیادت میں عوام کی بے لوث خدمت کا سفر جاری و ساری رہے گا۔