ایمزٹی وی (تعلیم) ہائر ایجوکیشن کمیشن پاکستان کا آن لائن سسٹم فلاپ ہو گیاجس کے نتیجے میں ایم فل و پی ایچ ڈی کے 3500سے زائد طلبا وطالبات اسکالر شپ سے محروم ہوگئے ۔ 
ذرائع کے مطابق ملک بھر سے 3500سے زائد طلبا وطالبات نے آن لائن سسٹم کے تحت ایم فل اور پی ایچ ڈی سکالر شپ کیلئے درخواستیں جمع کرائیں تھیں جن کی ای میل کے ذریعے وصولی کی تصدیق کی گئی، بعد ازاں ان طلبا و طالبات نے شارٹ لسٹ ہونے اورانٹرویوز کے سلسلہ میں متعلقہ افسروں سے رابطہ کیا تو انہیں بتایا گیا کہ آپ کی تو درخواستیں موصول نہیں ہوئیں۔ 
تفصیلات کے مطابق آن لائن سسٹم کی خرابی کی ذمہ داری امیدواروں پر ڈال دی گئی ہے حالانکہ درخواست کی وصولی کی تصدیق کا پیغام موجود ہے ۔جبکہ فی طالبعلم 500 روپے فیس بھی جمع ہے ، صورتحال کا فوری تدارک کیا جائے ورنہ قانونی چارہ جوئی اور دیگر اقدامات اٹھانے پر مجبور ہونگے۔ جبکہ دوسری جانب ایچ ای سی کے ایگزیکٹو ڈائریکٹر ڈاکٹر ارشد سے موقف جاننے کیلئے رابطہ نہ ہوسکا۔